وزیراعظم عمران خان اقوام متحدہ کی جنرل اسمبلی کے 74 ویں سیشن میں شرکت کیلئے نیویارک کے دورہ سے قبل 19 ستمبرکو سعودی عرب جائیں گے

جمعرات 19 ستمبر 2019 00:15

اسلام آباد ۔ (اُردو پوائنٹ اخبارتازہ ترین - اے پی پی۔ 19 ستمبر2019ء) وزیراعظم عمران خان اقوام متحدہ کی جنرل اسمبلی کے 74 ویں سیشن میں شرکت کیلئے نیویارک کے دورہ سے قبل 19 سے لے کر 20 ستمبر تک سعودی عرب کا دورہ کریں گے ۔ سعودی عرب کے اپنے دورے میں وزیراعظم عمران خان سعودی قیادت سے 5 اگست کے بعد بھارت کے غیر قانونی اور یکطرفہ اقدام سے مقبوضہ جموں و کشمیر میں پیدا ہونے والی سنگین صورتحال کے مختلف پہلوئوں کو زیر بحث لائیں گے۔

وزیراعظم عمران خان کشمیر کے ایشو پر ولی عہد شہزادہ محمد بن سلمان سے مسلسل رابطہ میں ہیں۔

(جاری ہے)

ولی عہد شہزادہ محمد بن سلمان کے فروری 2019ء میں دورہ پاکستان کے بعد سے پاکستان اور سعودی عرب کے درمیان تمام شعبوں میں تعلقات میں نمایاں بہتری آئی ہے اور یہ تیزی سے آگے بڑھ رہے ہیں۔ وزیراعظم کے دورہ کے دوران دونوں جانب سے پاکستان اور سعودی عرب کے درمیان اقتصادی شراکت داری کو مزید مستحکم بنانے کے مختلف پہلوئوں پر تبادلہ خیال کیا جائے گا۔ پاکستان اور سعودی عرب کے تعلقات روایتی طور پر پرجوش اور باہمی اعتماد پر مبنی ہیں۔ وزیراعظم کے دورہ سعودی عرب سے دونوں ممالک کے مابین قریبی برادرانہ تعلقات کو مزید تقویت ملے گی اور مختلف شعبوں میں دوطرفہ تعاون کو مزید تقویت ملے گی۔