جدید ترین انفراسٹرکچر کے حامل علامہ اقبال انڈسٹریل سٹی کا افتتاح دسمبر میں ہو گا

لاہور (اُردو پوائنٹ اخبارتازہ ترین - اے پی پی۔ 19 ستمبر2019ء) فیصل آباد انڈسٹریل اسٹیٹ ڈویلپمنٹ اینڈ منیجمنٹ کمپنی (فیڈمک) کے چیئرمین میاں کاشف اشفاق نے کہا ہے کہ جدید ترین انفراسٹرکچر کے حامل علامہ اقبال انڈسٹریل سٹی کا افتتاح دسمبر میں ہو گا ۔ منصوبے کیلئے زمین کے حصول کا کام ہنگامی بنیادوں پر شروع کر دیا جائے گا۔ ان خیالات کا اظہارانہوں نے فیڈمک کیمپ آفس میں غیر ملکی اور مقامی سرمایہ کاروں کے وفد سے گفتگو کرتے ہوئے کیا۔

انہوں نے کہا کہ علامہ اقبال انڈسٹریل سٹی چین پاکستان اقتصادی راہداری کا حصہ ہے جو قومی وبین الاقوامی سطح پر تجارت اور سرمایہ کاری کے فروغ میں اہم کردار ادا کرے گا جو موجودہ حکومت کی اولین ترجیح ہے۔انڈسٹریل سٹی میں 350 سے 400 میگا صنعتی یونٹ قائم کیے جائیں گے جن سے روزگار کے اڑھائی سے تین لاکھ مواقع پیدا ہوںگے ۔

(جاری ہے)

انہوں نے کہا کہ حکومت کی طرف سے سرمایہ کاروں کو پیش کردہ بہترین مراعاتی پیکیج سے براہ راست بڑی غیر ملکی سرمایہ کاری آئے گی ۔

خصوصی اقتصادی زون میں سرمایہ کاری کیلئے مزید کئی مفاہمتی یادداشتوں پر دستخط ہوچکے ہیں۔ انہوں نے مزید کہا کہ یہاں سمال اینڈ میڈیم انٹرپرائز (ایس ایم ایز) کے شعبے کو فروغ دینے کیلئے ایک حصہ مختص کیا گیا ہے جس سے صنعتی اسٹیٹ میں نئے ایس ایم ایز کو فروغ حاصل ہو گا۔ میاں کاشف نے سرمایہ کاروں کو ملک میں معاشی سرگرمیوں کو فروغ دینے کیلئے وزیر اعظم عمران خان کے معاشی اصلاحات پیکیج کے اہم نکات سے بھی آگاہ کیا اور کہا کہ بین الاقوامی تجارت اور سرمایہ کاری کا فروغ حکومتی پالیسیوں کا محور ہے۔

انہوں نے کہا کہ حکومت پبلک پرائیویٹ پارٹنرشپ کی حوصلہ افزائی کر رہی ہے ۔ میاں کاشف اشفاق نے کہا کہ سابق حکومتوں کی غلط پالیسیوں کی وجہ سے ملک نادہندہ ہونے کے قریب تھا، زرمبادلہ کے ذخائر انتہائی کم ہوچکے تھے اور کوئی بھی بین الاقوامی مالیاتی ادارہ قرضہ دینے کے لئے بھی تیار نہیں تھا۔ پاکستان تحریک انصاف کی حکومت نے سخت محنت کر کے معیشت کوبہتری کی طرف گامزن کیاہے۔

انہوں نے کہا کہ پاکستان کے بے انتہا قدرتی اور انسانی وسائل کا استعمال سمجھداری اور درست طریقے سے کیا جائے تو ہم ترقی یافتہ ممالک میں شامل ہو سکتے ہیں ۔ اپوزیشن کی کڑی تنقید کے باوجود وزیر اعظم درست سمت میں آگے بڑھ رہے ہیں اور قائد اعظم کے ویژن کے مطابق پاکستان کو ترقی یافتہ ملک بنانے کے لئے بھر پور جدو جہد کر رہے ہیں کیونکہ وہ ایک کھلاڑی ہونے کے ناطے آخری گیند تک میچ جیتنے کی کوشش پر یقین رکھتے ہیں۔