Live Updates

وزیراعظم عمران خان اقوامِ متحدہ کے جنرل اسمبلی اجلاس میں شرکت کے لیے امریکہ پہنچ گئے

وزیراعظم کا دورہ امریکہ 21سے 28ستمبر تک جاری رہے گا، وزیراعظم اقوام متحدہ کی جنرل اسمبلی کے اجلاس کے دوران وہ 15 سے زائد سربراہان مملکت سے ملاقات بھی کریں گے

Usman Khadim Kamboh عثمان خادم کمبوہ ہفتہ ستمبر 20:07

وزیراعظم عمران خان اقوامِ متحدہ کے جنرل اسمبلی اجلاس میں شرکت کے لیے ..
واشنگٹن (اُردو پوائنٹ تازہ ترین اخبار۔ 21 ستمبر 2019ء) وزیراعظم عمران خان اقوامِ متحدہ کے جنرل اسمبلی اجلاس میں شرکت کے لیے امریکہ پہنچ گئے ہیں۔ وزیراعظم کا دورہ امریکہ 21سے 28ستمبر تک جاری رہے گا، وزیراعظم اقوام متحدہ کی جنرل اسمبلی کے اجلاس کے دوران وہ 15 سے زائد سربراہان مملکت سے ملاقات بھی کریں گے۔ وزیراعظم عمران خان سعودی ولی عہد شہزادہ محمد بن سلمان کے ذاتی جہاز پر امریکہ پہنچے ہیں۔

 
خیال رہے کہ آج صبح وزیراعظم عمران خان کمرشل فلائٹ کی بجائے سعودی ولی عہد کے خصوصی طیارے پر امریکہ روانہ ہوئے۔ سعودی ولی عہد شہزادہ محمد بن سلمان نے وزیراعظم عمران خان سے سوال کیا کہ آپ دورہ امریکہ پر کیسے جا رہے ہیں؟ جس پر وزیراعظم عمران خان نے جواب دیا کہ میں کمرشل فلائٹ کے ذریعے امریکہ روانہ ہو رہا ہوں۔

(جاری ہے)

سعودی ولی عہد شہزادہ محمد بن سلمان نے کہا کہ آپ ہمارے مہمان ہیں ، کمرشل فلائٹ پر امریکہ نہیں جا سکتے۔ ذرائع نے بتایا کہ سعودی ولی عہد نے امریکہ جانے کے لیے پاکستان کے وزیراعظم عمران خان کو اپنا ذاتی طیارہ فراہم کیا۔ دوسری جانب وزارت خارجہ حکام نے وزیراعظم عمران خان کے دورہ امریکہ کے دوران ان کی مصروفیات کو حتمی شکل دے دی ۔ سفارتی ذرائع کے مطابق وزیراعظم کا دورہ امریکہ 21 سے 28 ستمبر تک جاری رہے گا جہاں وہ اقوام متحدہ کی جنرل اسمبلی کے اجلاس کے دوران وہ 15 سے زائد سربراہان مملکت سے ملاقات کریں گے۔

ذرائع کے مطابق وزیراعظم پاکستان، ترکی اور ملائشیا کے سہ فریقی اجلاس میں بھی شرکت کریں گے۔ 24 ستمبر کو وہ اقوام متحدہ کی جنرل اسمبلی کے اعلیٰ سطحی اجلاس کی افتتاحی تقریب میں شرکت کریں گے۔ ذرائع نے بتایا ہے کہ وزیراعظم کے دورہ امریکہ کے دوران پاکستانی کمیونٹی سے بھی خطاب کا امکان ہے۔ 24 ستمبر کو عمران خان امریکی صدر کی جانب سے دئیے جانے والے عشائیے میں شرکت کریں گے جہاں دونوں رہنماؤں کی غیر رسمی ملاقات کا امکان ہے۔ 27 ستمبر کو وزیراعظم جنرل اسمبلی سے خطاب کریں گے، یہ خطاب پاکستانی وقت کے مطابق شام ساڑھے 8 سے رات 10 بجے کے درمیان ہو گا، اس موقع پر وہ مقبوضہ کشمیر کی صورتحال پر بات کریں گے۔
تنازعہ مقبوضہ کشمیر کی بھڑکتی ہوئی آگ سے متعلق تازہ ترین معلومات