مدینہ منورہ کے مضافاتی علاقے میں خونخوار چیتے نے تباہی پھیلا دی

مدینہ منورہ(اُردو پوائنٹ اخبارتازہ ترین،23 ستمبر 2019ء) مدینہ منورہ کے مضافاتی علاقے البیضا میں ایک بپھرے ہوئے چیتے نے علاقے میں شدید خوف و ہراس پھیلا دیا۔ تفصیلات کے مطابق البیضا میں ایک فارم ہاؤس میں پالتو چیتا رکھا گیا تھا۔ گزشتہ روز فارم ہاؤس کے ملازم نے چیتے کو کھانا ڈالامگر باہر آنے کے بعد پنجرے کا دروازہ بند کرنا بھُول گیا۔ چیتے نے برسوں بعد یہ موقع دیکھ کر فوراً پنجرے سے باہر چھلانگ لگائی اور پاس ہی کھڑے ملازم کو دبوچ کر اسے چند لمحوں میں ہی چیر پھاڑ ڈالا۔

اتفاق سے اس وقت فارم ہاؤس میں دیگر ملازمین موجود نہیں تھے ورنہ مزید جانی نقصان ہو سکتا تھا۔ چیتے نے فارم ہاؤس میں موجودبکریوں اور دیگر جانوروں کو بھی مار کر اپنی بھُوک مٹائی اور اس کے بعد فارم ہاؤس سے فرار ہو گیا۔

(جاری ہے)

جب چیتے کے فرار ہونے اور ہلاکتوں کی خبر آس پاس کے علاقے میں پھیلی تو لوگوں میں شدید خوف و ہراس پھیل گیا۔ لوگ گھروں میں محصور ہو کر رہ گئے اور بچوں کو بھی گھر سے باہر نکلنے سے منع کر دیا۔

تاہم بعد میں اہلِ علاقہ نے اپنی مدد آپ کے تحت چیتے کو ڈھونڈ نکالا۔ اسی دوران وہاں پر وائلڈ لائف کے اہلکار بھی پہنچ گئے، مگر فارم ہاؤس کے ملازمین نے چیتے کو پہلے ہی پکڑ لیا تھا۔ اس واقعے پر علاقے کے لوگوں نے سخت ردِعمل ظاہر کرتے ہوئے کہا ہے کہ انسانی آبادی والے علاقوں میں اس طرح کے خونخوار جانوروں کو رکھنا کسی بھی طرح مناسب نہیں ہے۔ اگر یہ چیتا پکڑا نہ جاتا تو جانے اور کتنی انسانی جانوں کا ضیاع ہوتا۔حکومت کو چاہیے تھے کہ اس فارم ہاؤس میں دوبارہ بند کیے گئے چیتے کو اپنی تحویل میں لے لے۔ تاکہ دوبارہ انسانی غفلت کی صورت میں کسی انسان یا جانور کی زندگی ضائع ہونے کا امکان نہ رہے۔