احتساب عدالت ، فاروق ایچ نائیک کو آصف زرداری سے جیل میں پیر کے علاوہ کسی اور روز ملاقات کرانے کی اجازت دینے کی درخواست مسترد

پیر 23 ستمبر 2019 19:51

اسلام آباد ۔ (اُردو پوائنٹ اخبارتازہ ترین - اے پی پی۔ 23 ستمبر2019ء) احتساب عدالت نے سابق صدر آصف علی زرداری کے وکیل فاروق ایچ نائیک کو آصف زرداری سے جیل میں پیر کے علاوہ کسی اور روز ملاقات کرانے کی اجازت دینے کی درخواست مسترد کر دی ہے۔ جج نے ریمارکس دیے کہ ملاقات کے لیے جو دن مقرر ہے اسی روز ملاقات کریں۔زیادہ مسئلہ ہے تو جائیں اوپر سے اجازت لے لیں۔

آصف علی زرداری کے وکیل فاروق ایچ نائیک کی مصروفیات کے باعث ان کی پیر کے علاوہ کسی اور روز جیل میں آصف زرداری سے ملاقات کرنے کی اجازت کے لیے متفرق درخواست دائر کی گئی۔ احتساب عدالت کے جج محمد بشیر نے سماعت کی تو فاروق ایچ نائیک کی جانب سے ان کے معاون وکیل عدالت میں پیش ہوئے اور موقف اختیار کیا کہ عدالت نے آصف علی زرداری سے جیل میں ملاقات کے لیے پیر کا دن مقرر کر رکھا ہے مگر اس روز فاروق ایچ نائیک مصروف ہیں اس لیے انہیں کسی اور روز ملاقات کی اجازت دی جائے۔

(جاری ہے)

جج احتساب عدالت محمد بشیر نے کہاکہ اس دن آپ نے دیکھا کہ ایک وکیل صفائی کتنی بدتمیزی کررہے تھے۔ جتنی رعایت کرو سب اتنا سر پر چڑھتے ہیں۔ معاون وکیل نے کہا مجھے نہیں معلوم کس وکیل نے بدتمیزی کی۔ جج نے ریمارکس دیے جس دن ملاقات کاوقت مقرر ہے تب ہی ملاقات کریں۔ زیادہ مسئلہ ہے تو جائیں اوپر سے اجازت لے لیں۔