ہواوے پر امریکی پابندیوں کے بعد روس نے اپنی سرزمین پیش کردی ،ماسکو میں پہلا فائیوجی ٹیسٹ ژون قائم

اتوار 29 ستمبر 2019 11:15

ماسکو ۔ (اُردو پوائنٹ اخبارتازہ ترین - اے پی پی۔ 29 ستمبر2019ء) امریکہ کی جانب سے چینی ٹیلی کمیونیکیشن کمپنی ہواوے پر جاسوسی الزامات کے باعث پابندیوں کے نفاذ کے بعد روس نے اس کے لیے اپنی سرزمین پیش کردی جس کا مقصد ملک میں 5 جی ٹیکنالوجی نیٹ ورک کا قیام اور فروغ ہے۔

(جاری ہے)

ذرائع ابلاغ کے مطابق امریکہ کی جانب سے چینی ٹیلی کام کمپنی پر پابندیوں کے نفاذ کا روس نے بھرپور فائدہ اٹھانا شروع کردیا ہے، رواں ماہ ہواوے نے روس کے دارالحکومت ماسکو میں ٹیکنالوجی کمپنی ایم ٹی ایس کی شراکت سے پہلے فائیو جی ٹیسٹ ژون کا آغاز کیا جس کا مقصد دارالحکومت کے نواحی علاقوں کو اس سروس کی فراہمی اور چین کے ساتھ یکجہتی کا اظہار ہے۔

ماسکو حکام کا کہنا ہے کہ یہ نیٹ ورک آئندہ چند سال کے دوران شہر کے عمومی ڈھانچے کا حصہ بن جائے گا۔روس کا ارادہ ہے کہ 2024 ء تک اس کے تمام بڑے شہروں میں فائیوجی ٹیکنالوجی فراہم کردی جائے۔یاد رہے کہ چینی صدر شی جن پنگ جب رواں سال ماسکو کے دورے پر گئے تو روسی کمپنی ایم ٹی ایس نے ہواوے کے ساتھ ٹیکنالوجی ٹرانسفر کے معاہدے پر دستخط کیے تھے۔