گرفتار صحافیوں سے متعلق سوال پر ایردوآن امریکی ٹی وی میزبان پر برس پڑے

انقرہ (اُردو پوائنٹ اخبارتازہ ترین - این این آئی۔ 02 اکتوبر2019ء) ترکی کے صدر رجب طیب ایردوآن نے حکومت کی جانب سے وسیع پیمانے پرگرفتاریوں بالخصوص صحافیوں کے حراست میں لیے جانے سے متعلق سوال پر کے امریکی ٹی وی کے میزبان کو نکتہ چینی کا نشانہ بنایا۔عرب ٹی وی کے مطابق ایردوآن نے ترکی کی جیلوں میں صحافیوں کی موجودگی کی تردید کی بلکہ سینہ زوری کرتے ہوئے ان تمام پر باغی ہونے کا الزام عائد کیا۔

جب امریکی ٹی وی کے میزبان نے ترکی کے صدر کی بات کو زیر بحث لانے کی کوشش کی تو ایردوآن بگڑ گئے اور میزبان سے کہا کہ تم میرے ساتھ ایک صحافی کی طرح نہیں بلکہ تحقیق کار کی طرح پیش آ رہے ہو۔میزبان نے بتایا کہ 2016 میں ناکام انقلاب کی کوشش کے بعد سے ترکی میں کم از کم 180 میڈیا ہائوسزکی جبری بندش عمل میں آئی، 2 لاکھ ویب سائٹس کو بلاک کر دیا گیا اور کم از کم 100 صحافیوں کو جیل کی سلاخوں کے پیچھے پہنچایا گیا۔

(جاری ہے)

اسی طرح سیکڑوں دیگر افراد کے خلاف بنا ثبوت کے دہشت گردی کے الزام میں عدالتی کارروائی انجام دی گئی۔ان چبھتے ہوئے حقائق پر ایردوآن کے پاس امریکی ٹی وی کے میزبان پر غصہ اتارنے کے سوا کوئی چارہ نہ تھا۔ ترکی کے صدر نے میزبان سے کہا کہ تم پر لازم ہے کہ ایک صحافی کی طرح بات چیت کرو تا کہ میں ایک سیاست دان کی طرح تمہارے سوالات کے جوابات دوں۔