متعلقہ وفاقی اور صوبائی ادارے قدرتی آفات کے نقصانات کم کرنے ، متاثرین کی بحالی کو یقینی بنانے کے لئے ہم آہنگی پیدا کریں،

اسلام آباد (اُردو پوائنٹ اخبارتازہ ترین - اے پی پی۔ 08 اکتوبر2019ء) صدرمملکت ڈاکٹر عارف علوی نے زلزلہ متاثرین سے ہمدردی اور یکجہتی کا اظہار کرتے ہوئے تمام متعلقہ وفاقی اور صوبائی اداروں پر زور دیا ہے کہ وہ قدرتی آفات کے خطرات میں کمی ، تیاری ، نقصانات میں کمی اور متاثرین کی بحالی کو یقینی بنانے کے لئے ہم آہنگی پیدا کریں۔ قدرتی آفات کا سامنا کرنے کے لئے خود کو تیار کرنے اور تباہی کے خطرے کو کم کرنے کے لئے زیادہ سے زیادہ کوششیں کرنے کے عزم کا اعادہ کرنے کی ضرورت ہے۔

یہ بات انہوں نے 8 اکتوبر 2005 کے تباہ کن زلزلے سے متاثرہ خاندانوں کے ساتھ یکجہتی اور ہمدردی کا اظہار کرنے کے لئے کو قومی یوم استقامت کے موقع پر اپنے پیغام میں کہی۔انہوں نے کہاکہ یہ دن ہمیں 2005 کے تباہ کن زلزلے کی یاد دلاتا ہے جس نے آزاد جموں و کشمیر ، خیبر پختونخوا اور ملک کے دیگر حصوں میں تباہی مچا دی تھی ، جس سے جان ، مال اور انفراسٹرکچر کا بے پناہ نقصان ہوا تھا۔

(جاری ہے)

آج میں پاکستان کے عوام کو خراج تحسین پیش کرنا چاہتا ہوں جنھوں نے قدرتی آفت کا سامنا کرتے ہوئے ہمت ، بے لوث ، قربانی کے جذبے اور استقامت کا مظاہرہ کیا ۔انہوں نے ان خاندانوں سے بھی دلی تعزیت کا اظہار کیاجو 24 ستمبر ، 2019 کو حالیہ زلزلے سے میرپور اور بھمبر اضلاع میں جے کے ضلع اور ضلع جہلم میں متاثر ہوئے تھے۔ انہوں نے یقین دلایا کہ غم کی اس گھڑی میں متاثرین سے ہم ہر ممکن تعاون کریں گے۔

صدر مملکت نے کہاکہ قومی یوم استقامت بھی ایک موقع ہے جس میں قدرتی آفات کا سامنا کرنے کے لئے خود کو تیار کرنے اور تباہی کے خطرے کو کم کرنے کے لئے زیادہ سے زیادہ کوششیں کرنے کے عزم کا اعادہ کیا جائے۔ڈاکٹر عارف علوی نے کہاکہ قدرتی آفات نے معیشت اور ہمارے معاشرے کے ہر شعبہ کو بری طرح متاثر کیا ہے۔ ڈیزاسٹر منیجمنٹ کا سب سے حساس پہلو کمزور افراد ، خواتین ، بچے ، بوڑھے اور معذور ہیں ، جو قدرتی آفات کے دوران اولین ترجیح ہونی چاہئے۔

انہوں نے کہاکہ یہ خوشی کی بات ہے کہ نیشنل ڈیزاسٹر مینجمنٹ اتھارٹی (این ڈی ایم ای) کے زیرقیادت ہمارے قومی ڈیزاسٹر منیجمنٹ سسٹم عوام میں شعور اجاگر کرنے اور کثیرجہتی صلاحیتوں میں اضافے کیلئے کوشاں ہیں۔ صدرمملکت نے تمام متعلقہ وفاقی اور صوبائی اداروں پر زور دیا کہ تباہی کے خطرے میں کمی ، تیاری ، تخفیف اور بحالی کو یقینی بنانے کے لئے ہم آہنگی پیدا کی جائے۔