8اکتوبرکا سانحہ آزمائش کی گھڑی تھی جس پر تمام قوم متحد نظر آئی: محمد عبدالشکور، صدر الخدمت فاوٴنڈیشن پاکستان

لاہور (اُردو پوائنٹ اخبارتازہ ترین۔ 08 اکتوبر2019ء) الخدمت فاوٴنڈیشن کے تحت بھی ملک بھر میں قدرتی آفات سے آگاہی کا قومی دن منایا گیا۔اس حوالے سے ملک کے مختلف شہروں میں آگاہی واکس، سیمینارز اور دعائیہ تقریبات کا انعقاد کیا گیا جس میں الخدمت فاوٴنڈیشن کے ذمہ داران سمیت طلبہ و طالبات اورزندگی کے مختلف شعبہ جات سے تعلق رکھنے والے افراد کی علاقہ کی کثیر تعداد نے شرکت کی۔

الخدمت فاوٴنڈیشن کے صدر محمد عبدالشکور نے اس موقع پر کہا کہ2005 کا زلزلہ پوری قوم کے لئے اور خاص طور پر حکومتی ادارو ں کے لئے ایک مشکل گھڑی اور کڑا امتحان تھاجس میں پوری قوم متحد نظر آئی اور دل کھول کر اپنے مصیبت زدہ بہن بھائیوں کی مدد کی۔ فلاحی اداروں نے بھی جس حد تک ممکن تھا زلزلہ زدگان کی خدمت کی۔

(جاری ہے)

اس موقع پرالخدمت فاؤنڈیشن نے زلزلہ زدگان کی بھر پور مدد کرکے خدمات کی ایک نئی تاریخ رقم کی اور 2005 ء کے زلزلے میں ریسکیو ،ریلیف اور ری ہیبلیٹیشن تمام مراحل میں خود کو پاکستان کے سب سے بڑے فلاحی ادارے کے طور پر منوایا۔

اس دن کو منانے کا مقصد 8 اکتوبر 2005 کے اس عظیم قدرتی سانحے کے نتیجے میں ضائع ہونے والی ہزاروں قیمتی انسانی جانوں کے ایصالِ ثواب کے لئے دعا کرنے کے ساتھ ساتھ قدرتی آفات کے دوران ان کا مردانہ وار مقابلہ کر نے اور جدید تقاضوں کے مطابق حکمت عملیاں اپنانے کے حوالے سے شعور اجاگر کرنا ہے تاکہ زیادہ سے زیادہ جان و مال کے تحفظ کو یقینی بنایا جاسکے۔