آزادکشمیر بھر میں شہدائے زلزلہ 8 اکتوبر 2005 کی14ویں برسی عقیدت و احترام اور دعائیہ تقریبات کے ساتھ منائی گئی

بدھ 9 اکتوبر 2019 00:00

مظفر آباد ۔ (اُردو پوائنٹ اخبارتازہ ترین - اے پی پی۔ 08 اکتوبر2019ء) آزادکشمیر بھر میں شہدائے زلزلہ 8 اکتوبر 2005 کی14ویں برسی عقیدت و احترام اور دعائیہ تقریبات کے ساتھ منائی گئی ۔ اس دن کو آفات سے آگاہی کے قومی دن کے طورپر بھی منایا گیا ۔

(جاری ہے)

دارالحکومت مظفرآباد میں مرکزی تقریب یونیورسٹی گرائونڈ میں منعقد ہوئی جس میںوزیر اعظم آزادحکومت ریاست جموںوکشمیر راجہ محمد فاروق حید رخان ، ایم کیو ایم پاکستان کے کنوینئرڈاکٹر فاروق ستار ، وزیر ڈیزاسٹر مینجمنٹ اتھارٹی احمد رضا قادری ، وزیر تعلیم بیرسٹر افتخار گیلانی ، وزیر مال سردار فاروق سکندر ،سربراہان محکمہ جات، شہداء کے لواحقین ، شہریوں اور طلباء وطالبات نے شرکت کی ۔

تقریب کا آغاز 8:52پر سائر ن بجا کرکیا گیااورایک منٹ کی خاموشی اختیارکی گئی۔اس موقع پر وزیراعظم آزاد کشمیر نے شہداء زلزلہ کی یادگار پر پھولوں کی چادر چڑھائی جبکہ چیئرمین مرکزی زکوة کونسل صاحبزادہ محمد سلیم چشتی نے شہداء کے درجات کی بلندی کیلئے فاتحہ خوانی کروائی۔آزاد کشمیر پولیس اورریسکیو 1122کے دستوں نے وزیر اعظم کو سلامتی پیش کی۔