پنجاب میں سرکاری اراضی کے آڈٹ کے لیے وزیر قانون راجہ بشارت کی سربراہی میں کمیٹی قائم

ؒکمیٹی زرعی، سکنی، کمرشل، الاٹ شدہ، لیز شدہ اورتجاوزات شدہ اراضی کی تفصیلی رپورٹ ایک ماہ میں وزیراعلیٰ کو پیش کرے گی ۱کمیٹی صوبہ بھر میں بننے والی ہاؤسنگ سکیموں بالخصوص جعلی ہاؤسنگ سکیموں کا خصوصی آڈٹ کرے گی : راجہ بشارت

بدھ 9 اکتوبر 2019 22:14

لاہور (اُردو پوائنٹ اخبارتازہ ترین - آن لائن۔ 09 اکتوبر2019ء) پنجاب حکومت نے صوبہ بھر میں سرکاری زمینوں کے آڈٹ کے لیے صوبائی وزیر قانون، پارلیمانی امور و سوشل ویلفیئر راجہ بشارت کی سربراہی میں کمیٹی قائم کر دی ہے جس کے نائب سربراہ صوبائی وزیر مال جبکہ ممبر کالونیزکمیٹی کے رکن اورسیکریٹری ہوںگی. دیگر ارکان میں سینئرممبر بورڈ آف ریونیو، سیکرٹری قانون اور ڈی جی پنجاب لینڈ ریکارڈ اتھارٹی شامل ہیں۔

(جاری ہے)

نوٹیفکیشن کے مطابق کمیٹی ہر ضلع میں زرعی، سکنی، کمرشل، الاٹ شدہ، لیز شدہ اورتجاوزات شدہ اراضی جبکہ اسکی سالانہ آمدن اور بقایا جات کے کوائف اکٹھے کرے گی۔ راجہ بشارت نے کہا ہے کہ کمیٹی فوری طور پر آڈٹ کا کام شروع کر رہی ہے اور ایک ماہ کے اندر تمام امور پر مبنی تفصیلی رپورٹ وزیر اعلیٰ پنجاب کو پیش کرے گی. انہوں نے کہا یہ کمیٹی صوبہ بھر میں بننے والی ہاؤسنگ سکیموں بالخصوص جعلی ہاؤسنگ سکیموں کا خصوصی آڈٹ کرے گی تاکہ ایسی جعلی سکیموں کے خلاف قانونی کارروائی عمل میں لائی جا سکے۔