Live Updates

مولانا فضل الرحمٰن کے آزادی مارچ کی ساکھ خطرے میں پڑ گئی: مولانا طاہر اشرفی

ممتاز عالم دین کے مطابق 28 مذہبی جماعتوں نے مولانا فضل الرحمان کے مذہبی نعروں سے لاتعلقی کا اظہار کر دیا

Muhammad Irfan محمد عرفان جمعرات اکتوبر 16:12

مولانا فضل الرحمٰن کے آزادی مارچ کی ساکھ خطرے میں پڑ گئی: مولانا طاہر ..
لاہور(اُردوپوائنٹ اخبارتازہ ترین۔10اکتوبر2019ء) پاکستان علماء کونسل کے چیئرمین علامہ طاہر اشرفی نے کہا ہے کہ مولانا فضل الرحمن اپنی سیاسی محرومی کے خاتمہ کے لئے ملک کے جمہوری نظام کو خطرے سے دوچارنہ کریں، اس وقت عالمی اور ہماری سرحدی صورتحال کسی تحریک کی متحمل نہیں ہوسکتی۔آج کے روز میڈیا سے بات کرتے ہوئے ممتاز عالم دین کا کہنا تھا کہ موجودہ حکومت نے ملک کے قیام کے 72 سال بعد پہلی دفعہ دینی مدارس کی حیثیت کو تسلیم کرتے ہوئے انہیں وزارت تعلیم سے منسلک کیا ہے۔

مولانا فضل الرحمن اپنی سیاسی محرومی کے ازالے کے لئے مذہبی نعروں کا استعمال نہ کریں اور سیاسی امور کے لئے مذہب کا استعمال بند کریں۔انہوں نے کہاکہ گزشتہ دنوں ملک کی 28 مذہبی جماعتوں نے مولانا فضل الرحمن کے ان مذہبی نعروں سے لا تعلقی کا اظہار کیا تھا اور ان کی اس تحریک اور ہنگامہ آرائی سے سب سے زیادہ نقصان کشمیر کاز اور ملک کو ہوگا۔

(جاری ہے)

اس وقت میڈیا کی توجہ مقبوضہ کشمیر میں 80 لاکھ کشمیریوں کی کسمپرسی اور حالت زار پر تھی لیکن ان کے اس مارچ کی وجہ سے میڈیا کی توجہ بھی تقسیم ہورہی ہے۔بھارت ہمارے خلاف کسی مہم جوئی کے تانے بانے بن رہا ہے، ہمارے وزیر اعظم کامیاب دورہ چین کے بعد سعودی عرب اور ایران جانے کا پروگرام بنا رہے ہیں جبکہ دوسری جانب مولانا فضل الرحمن ملک کو سیاسی عدم استحکام سے دو چار کرنے کے درپے ہیں، اس مہم جوئی میں انہیں اپوزیشن کا تعاون بھی حاصل نہیں ہے۔ علامہ طاہر اشرفی نے کہا کہ مولانا فضل الرحمن 20 سال بعد اقتدار سے محروم ہوئے ہیں اس لئے بے چین ہیں اور ان کی اس بے چینی کے نتیجے میں ملک کے موجودہ سیاسی نظام کو بھی خطرہ ہوسکتا ہے۔
مولانا فضل الرحمان کا آزادی مارچ کا اعلان سے متعلق تازہ ترین معلومات