ضمنی الیکشن حلقہ این اے 3میرپور‘ ریٹرئنگ آفیسر کے پاس کاغذات نامزدگی کی داخل کروانے کی آخری تاریخ 21-10-2019مقرر

جمعہ 11 اکتوبر 2019 13:34

مظفرآباد(اُردو پوائنٹ اخبارتازہ ترین - این این آئی۔ 11 اکتوبر2019ء) آزاد جموں وکشمیر الیکشن کمیشن کی جانب سے آزاد جموںوکشمیر قانون ساز اسمبلی کے حلقہ ایل اے ۔3میرپو رکے ضمنی انتخاب کے انعقاد کے سلسلہ میں جاری شدہ الیکشن شیڈول کے مطابق ریٹرئنگ آفیسر کے پاس کاغذات نامزدگی کی داخل کروانے کی آخری تاریخ 21-10-2019مقرر ہے ۔ آزاد جموں و کشمیر قانون ساز اسمبلی (الیکشنز) آرڈیننس 1970کی دفعہ 47-Aکی رو سے انتخاب میں حصہ لینے والے امیدواران کے لیے لازم ہے کہ وہ ریٹرئنگ آفیسر کے پاس کاغذات نامزدگی داخل کروانے سے قبل اپنے منقولہ وغیرمنقولہ اثاثہ جات کی تفصیل آزاد جموںوکشمیر الیکشن کمیشن کے پاس جمع کروائیں ۔

لہذا متذکرہ بالا حلقہ کے ضمنی انتخاب میں حصہ لینے والے جملہ امیدواران کو بذریعہ پریس ریلیز مطلع کیا جاتا ہے کہ وہ ریٹرئنگ آفیسر کے پاس اپنے کاغذات نامزدگی داخل کروانے سے قبل اسٹامپ پیپرپر اپنے منقولہ و غیر منقولہ اثاثہ جات کی تفصیل سیکرٹری آزاد جموں وکشمیر الیکشن کمیشن کے پاس ان کے دفتر واقع بلاک نمبر 06(گرائونڈ فلور) سول سیکرٹریٹ چھتر دومیل مظفرآباد میں جمع کروا کر رسید حاصل کر لیں تاکہ ریٹرنگ آفیسر کے پاس کاغذات نامزدگی داخل کرواتے وقت یہ رسید بھی کاغذات کے ساتھ شامل کر کے پیش کی جاسکے ۔

(جاری ہے)

اثاثہ جات کی تفصیل کا نمونہ الیکشن کمیشن سے حاصل کیا جاسکتا ہے ۔ یہ بات آزاد جموں وکشمیر الیکشن کمیشن کے ترجمان نے ایک پریس ریلیز میں بتائی ۔