منی گرام اور بینک الفلاح کے درمیان نئے بنک ڈیپازٹ کھولنے کے معاہدے پر دستخط

ہفتہ 12 اکتوبر 2019 22:47

اسلام آباد ۔ (اُردو پوائنٹ اخبارتازہ ترین - اے پی پی۔ 12 اکتوبر2019ء) چیئرمین /چیف ایگزیکٹو آفیسر منی گرام الیکس ہومز اور چیف ایگزیکٹو آفیسر بنک الفلاح بلال اصغر نے نئے بنک ڈیپازٹ کھولنے کے معاہدے پر دستخط کئے ہیں جس سے صارفین پاکستان میں کسی بھی بنک اکائونٹ میں رقم بھیج سکیں گے۔ معاہدوں پر دستخط کرنے کی تقریب کے موقع پر وزیراعظم کے برطانیہ اور یورپ کیلئے تجارت و سرمایہ کاری کیلئے ترجمان صاحبزادہ جہانگیر بھی موجود تھے۔

(جاری ہے)

انہوں نے صحافیوں سے گفتگو کرتے ہوئے کہا کہ پاکستان اہم منڈی ہے جوکہ شرح نمو بالخصوص ترسیلات زر وصول کرنے کی صلاحیت رکھتی ہے۔ انہوں نے کہا کہ وزیراعظم عمران خان کی منی لانڈرنگ کے خاتمہ کی پالیسی کے تناظر میں بیرون ملک مقیم پاکستانیوں کو اس معاہدے سے اپنی محنت کی کمائی واپس پاکستان بھیجنے کی سہولت اور آسانی رہے گی۔ انہوں نے کہا کہ منی گرام اور بنک الفلاح کے درمیان نئے معاہدے سے صارفین کو ان کی ضروریات کے مطابق خدمات کی فراہمی میں مدد ملے گی۔ تقریب میں سینئر بنکاروں نے بھی شرکت کی۔