آصف زرداری کی جان کو خطرہ ہے ، احتساب عدالت میں درخواست دائر کر دی گئی

پیر 14 اکتوبر 2019 20:25

اسلام آباد(اُردو پوائنٹ اخبارتازہ ترین - این این آئی۔ 14 اکتوبر2019ء) سابق صدر آصف زرداری کو جیل سے اسپتال منتقل کرنے کیلئے احتساب عدالت میں درخواست دائر کر دی ، جس میں کہا گیا ہے کہ آصف زرداری کی جان کو خطرہ ہے ، جیل میں طبی سہولیات ملنا آصف زرداری کا حق ہے۔پیر کو آصف زرداری کے وکیل سردار لطیف کھوسہ نے سابق صدر کو جیل سے ہسپتال منتقل کرنے کیلئے احتساب عدالت میں درخواست دائر کر دی ، لطیف کھوسہ نے دلائل دیتے ہوئے کہا کہ آصف زرداری کی جان کو خطرہ ہے۔

جیل میں طبی سہولیات ملنا آصف زرداری کا حق ہے۔وکیل نے کہا کہ زرداری اس حکومت سے کچھ بھی نہیں لینا چاہتے لیکن جو قانونی حق ہے وہ دیا جائے،ہم نے ضیا الحق سے بھی معافی نہیں مانگی تھی، عدالتی ریلیف ہمارا حق ہے۔

(جاری ہے)

انہوںنے کہاکہ زرداری صاحب کو دل کی تکلیف ہوئی تو یہ لوگ اسپتال نہیں پہنچا سکیں گے، اڈیالہ جیل سے اسپتال تک ڈیڑھ گھنٹہ لگ جاتا ہے، میڈیکل بورڈ نے طبی سہولیات کے لئے زرداری کو پمز منتقل کرنے کا کہا، یہ لوگ ایک دن پمز لیکر گئے دوسرے دن واپس جیل لے گئے۔

لطیف کھوسہ نے کہا کہ جب تک زرداری جیل میں ذاتی اٹینڈینٹ ساتھ رکھنے کی اجازت بھی دیں۔ ہمارے لوگ جیل کے باہر اپنا خیمہ لگا لیں گے ، صرف صبح اور شام اندر جا کر چیک کریں گے۔ عدالت نے دلائل سننے کے بعد درخواست پر فیصلہ محفوظ کر لیا۔