برٹش ایئر ویز کی پروازوں کی بحالی کے بعد شاہی جوڑے کی آمد نئے، روشن اور پرعزم پاکستان کی آئینہ دار ہے

پاکستان اور اس کے عوام شاہی مہمانوں کا خیر مقدم کرتے ہیں، امید ہے شہزادہ ولیم اور شہزادی کیٹ مڈلٹن خوبصورت یادیں اپنے ساتھ لے کر جائیں گے وزیراعظم کی معاون خصوصی برائے اطلاعات و نشریات ڈاکٹر فردوس عاشق اعوان کا ٹویٹ

منگل 15 اکتوبر 2019 11:52

برٹش ایئر ویز کی پروازوں کی بحالی کے بعد شاہی جوڑے کی آمد نئے، روشن ..

اسلام آباد (اُردو پوائنٹ اخبارتازہ ترین - اے پی پی۔ 15 اکتوبر2019ء) وزیراعظم کی معاون خصوصی برائے اطلاعات و نشریات ڈاکٹر فردوس عاشق اعوان نے کہا ہے کہ برٹش ایئر ویز کی پروازوں کی بحالی کے بعد شاہی جوڑے کی آمد نئے، روشن اور پرعزم پاکستان کی آئینہ دار ہے، یہ دورہ پاک برطانیہ تعلقات کی مضبوطی سمیت دنیا بھر میں ملک کے حقیقی اور مثبت تشخص کو اجاگر کرے گا۔

(جاری ہے)

پاکستان سیاحوں کیلئے حسین اور پرکشش منزل بن کر ابھر رہا ہے۔ منگل کوڈاکٹر فردوس عاشق اعوان نے اپنے ٹویٹ میں کہا کہ پاکستان عظیم ثقافتی ورثے کا امین اور قدیم تہذیب کا مسکن ہے، یہاں کے تاریخی مقامات اور شمالی علاقہ جات کی مسحورکن خوبصورتی سرزمین پاکستان کو منفرد بناتی ہے۔ انہوں نے کہا کہ پاکستان اور اس کے عوام شاہی مہمانوں کا خیر مقدم کرتے ہیں، امید ہے شہزادہ ولیم اور شہزادی کیٹ مڈلٹن خوبصورت یادیں اپنے ساتھ لے کر جائیں گے۔