مولانا فضل الرحمان کا بنیادی مقصد سابق صدر آصف علی زرداری اور سابق وزیر اعظم نواز شریف کے خلاف جاری احتساب کے عمل کو روکنا ہے

وفاقی وزیر برائے پارلیمانی امور اعظم خان سواتی کی و نجی ٹی وی سے بات چیت

بدھ 16 اکتوبر 2019 00:50

اسلام آباد ۔ (اُردو پوائنٹ اخبارتازہ ترین - اے پی پی۔ 16 اکتوبر2019ء) وفاقی وزیر برائے پارلیمانی امور اعظم خان سواتی نے کہا ہے کہ جمیعت علمائے اسلام (جے یو آئی) ف کے سربراہ مولانا فضل الرحمان کا بنیادی مقصد سابق صدر آصف علی زرداری اور سابق وزیر اعظم نواز شریف کے خلاف جاری احتساب کے عمل کو روکنا ہے۔ منگل کو نجی ٹی وی سے بات چیت کرتے ہوئے انہوں نے کہا کہ پاکستان پیپلز پارٹی اور پاکستان مسلم لیگ ن آصف علی زرداری اور نواز شریف سمیت اپنے دیگر رہنمائوں کی رہائی کیلئے مولانا فضل الرحمان کو ڈھال کے طور پر استعمال کر رہی ہیں لیکن وہ اپنے مذموم مقاصد میں کامیاب نہیں ہوں گے۔

وفاقی وزیر نے کہا کہ وزیر اعظم عمران خان کی متحرک قیادت میں پی ٹی آئی حکومت بدعنوانی کی لعنت کے مکمل خاتمے کیلئے پرعزم ہے، وزیر اعظم عمران خان نے پہلے ہی واضح کر رکھا ہے کہ کرپٹ اور لٹیروں کو کسی صورت این آر او نہیں دیں گے چاہے وہ جو مرضی کر لیں۔

(جاری ہے)

انہوں نے کہا کہ پرامن احتجاج ہر سیاسی جماعت کا آئینی حق ہے لیکن قانون شکنی کی گئی تو قانون اپنا راستہ اختیار کرے گا۔ انہوں نے کہا کہ مولانا فضل الرحمان مذہب کے نام پر ذاتی مفادات کیلئے مدارس کے طلبہ کو استعمال کر رہے ہیں۔ انہوں نے دعویٰ کیا کہ غیر ملکی قوتیں مولانافضل الرحمان کو اسلام آباد کی طرف مارچ کیلئے سپورٹ کر رہی ہیں اور میرے خیال میں ہمیں اسے ایک سازش کے طور پر لینا چاہئیے۔