زخمی حسن علی کی نیشنل ٹی ٹونٹی کپ میں شرکت مشکوک

لاہور(اردو پوائنٹ تازہ ترین اخبار۔ 16 اکتوبر2019ء) فاسٹ باﺅلر حسن علی کمر کی تکلیف کے باعث سری لنکا کے خلاف ہوم سیریز نہ کھیل سکے اور اب ان کی نیشنل ٹی ٹونٹی کپ میں بھی شرکت مشکوک ہے۔گزشتہ دو روز میں حسن علی کی فٹنس کا جائزہ لیا گیا لیکن اس دوران فاسٹ باﺅلر کی تکلیف بڑھتی ہوئی دکھائی دی اور وہ باﺅلنگ اور ویٹ ٹریننگ بھی نہ کر سکے۔ذرائع کا کہنا ہے کہ حسن علی کی نیشنل ٹی ٹونٹی کپ میں شرکت کا امکان تقریباً ختم ہوتا دکھائی دے رہا ہے جب کہ اس کے ساتھ ساتھ ان کی آسٹریلیا کے خلاف ٹی ٹونٹی سیریز میں بھی شرکت کا امکان نہیں ہے۔

(جاری ہے)

فاسٹ باﺅلر حسن علی کی نیشنل ٹی ٹونٹی کپ کے لیے سینٹرل پنجاب کی 16 رکنی ٹیم میں شمولیت فٹنس سے مشروط رکھی گئی تاہم ان کی فٹنس پر نیشنل کرکٹ اکیڈمی ،لاہور میں کام جاری ہے۔واضح رہے کہ آسٹریلیا کے خلاف سیریز کے لیے اگلے ہفتے سکواڈ کا اعلان کیا جائے گا۔ پاکستان نے آسٹریلیا میں سیریز کے پہلے مرحلے میں تین ٹی ٹونٹی میچز کھیلنے ہیں ، سیریز کا آغاز 3 نومبر سے ہو گا جس کے بعد دو ٹیسٹ میچز پر مشتمل سیریز کھیلی جائے گی ۔