مولانا فضل الرحمان وقت سے پہلے حکومت کیخلاف دھرنا دے رہے ہیں:شاہد آفریدی

لاہور(اردو پوائنٹ تازہ ترین اخبار۔ 17 اکتوبر2019ء) ایک جانب جہاں پورے ملک میں جمعیت علمائے اسلام(ف ) کے اعلان کردہ آزادی مارچ کی دھوم ہے وہیں قومی ٹیم کے سابق کپتان شاہد آفریدی نے بھی اس پر اپنا رد عمل دے دیا ہے ۔ میڈیا سے گفتگو کرتے ہوئے شاہد آفریدی کا کہنا تھا کہ مولانا فضل الرحمان وقت سے پہلے دھرنا دے رہے ہیں ، انہیں حکومت کو کچھ وقت دینا چاہیئے ، اپوزیشن کو وزیر اعظم عمران خان کی حمایت کرنا چاہیئے ۔

قومی ٹیم کے حالیہ ناقص پرفارمنس کے بارے میں کیے گئے سوال کے جواب میں ان کا مزید کہنا تھا کہ قومی ٹیم کے حالت گزشتہ ستر سال سے ایسی ہی ہے ، ہمارے ملک میں نیا ٹیلنٹ سامنے آتا ہے اور پھر دوبارہ غائب ہوجاتا ہے ۔ قومی ٹیم کے سابق کپتان نے مزید کہا کہ ہیڈ کوچ اور چیف سلیکٹر مصباح الحق کے پا س اس وقت تین عہدے ہیں اس لیے ان پر بھاری ذمہ داری عائد ہوتی ہے ،انہیں قومی ٹیم کی حالت درست کرنے کے لیے سخت فیصلے کرنے ہوں گے ۔

(جاری ہے)

یاد رہے کہ جمعیت علمائے اسلام (ف ) نے 27اکتوبر کو ملک بھر میں آزادی مارچ کا اعلان کررکھا ہے جس کے جواب میں حکومت کی جانب سے انہیں مذاکرات کی پیش کش بھی کی گئی تھی جسے مولانا فضل الرحمان نے مسترد کردیا۔