شاہی جوڑے کو بادشاہی مسجد میں قرآن مجید کی تلاوت سنائی گئی

برطانوی شہزادے ولیم اور شہزادی کیٹ میڈلٹن کی بادشاہی مسجد آمد کے موقع پر شاہی مہمانوں کے استقبال کیلئے 1800 فٹ لمبا ریڈ کارپٹ بچھایا گیا‘ اس موقع پر آرٹ کے مورخ فقیر سید اعزاز الدین نے مسجد کی تاریخی عمارت اور تاریخ کے متعلق شاہی مہمانوں کو بریفنگ دی‘ شاہی مہمانوں کی آمد پر فانوس بھی روشن کئے گئے‘ خطیب بادشاہی مسجد عبدالخبیر آزاد نے معزز مہمانوں کو شہزادے چارلس کے 2006ء اور شہزادی ڈیانا کے 1996ء میں بادشاہی مسجد کے دورہ کے بارے میں بتایا‘ مولانا عبدالخبیر آزاد نے اس موقع پر مہمانوں کو بادشاہی مسجد کی پینٹنگ اور روایتی سفید شال پیش کی‘ علاوہ ازیں شہزادہ ولیم نے مولانا عبدالخبیر آزاد کی قیادت میں بادشاہی مسجد لاہور میں بین المذاہب ہم آہنگی کے حوالے سے اجلاس میں شرکت بھی کی۔

اس کے علاوہ برطانوی شہزادہ ولیم اورشہزادی کیٹ مڈلٹن نے لاہورمیں نیشنل کرکٹ اکیڈمی کادورہ کیا اوراس موقع پر انہو ں نے قومی کرکٹرز کے ساتھ کرکٹ بھی کھیلی۔ اکیڈمی میں چیئرمین پی سی بی احسان مانی نے شاہی جوڑے کا استقبال کیا،معزز مہمانوں نے نیشنل کرکٹ اکیڈمی میں کرکٹ کھیلی اور بھرپور انجوائے کیا۔اس سے قبل شاہی جوڑے کی لاہور آمد پر ان کا ریڈ کارپٹ استقبال کیا گیا اور بچوں نے مہمانوں کو پھول پیش کیے۔لاہور ا یئرپورٹ پر شاہی جوڑے کا استقبال گورنر پنجاب چوہدری محمد سرور اور وزیر اعلیٰ پنجاب عثمان بزدار نے کیا اور انہیں تحائف پیش کیے۔