ٹویوٹا آزاد موٹرز کمپنی کے مالک سابق وزیر چوہدری محمد سعیدکو ایک کروڑ ہرجانے کا نوٹس جاری

جمعہ 18 اکتوبر 2019 18:18

مظفرآباد ۔ (اُردو پوائنٹ اخبارتازہ ترین - اے پی پی۔ 18 اکتوبر2019ء) سپریم کورٹ آزاد جموں و کشمیر کی جانب سے ٹویوٹا آزاد موٹرز کمپنی کے مالک چوہدری محمد سعید سابق وزیر حکومت کے نام مبلغ ایک کروڑ ہرجانے کا نوٹس جاری کردیا۔سپریم کورٹ کا حکم۔سپریم کورٹ سے جاری ہونے والی پریس ریلیز کے مطابق مورخہ 11 اکتوبر 2019 کو سابق چیف جسٹس آزاد جموں و کشمیر جسٹس خواجہ شہاد احمدکی اسلام آباد میں سرکاری گاڑی محکمہ کسٹم نے ضبط کرتے ہوئے مؤقف اختیار کیا کہ اس گاڑی کا کسٹم ادا نہیں کیا گیا۔

واضح رہے کی یہ گاڑی سپریم کورٹ آزاد جموں و کشمیر نے ٹویوٹا آزاد موٹرز میرپور سے خریدی تھی۔ رجسٹرار سپریم کورٹ کی جانب سے جاری نوٹس میں تحریر ہے کہ گاڑی کی ضبطگی کے واقعہ سے سپریم کورٹ آزاد جموں و کشمیر کی ساکھ اور احترام کو نقصان پہنچا ہے۔

(جاری ہے)

سپریم کورٹ نے چوہدری محمد سعید سابق وزیر حکومت جو کہ ٹویوٹا آزاد موٹرز کمپنی کے مالک ہیں کے نام نوٹس جاری کرتے ہوئے انہیں مبلغ پچاس لاکھ روپے سپریم کورٹ آزاد جموں و کشمیر جبکہ پچاس لاکھ روپے جناب جسٹس خواجہ شہاد احمد سابق چیف جسٹس سپریم کورٹ کو ادا کرنے کا حکم دیا۔

۔ سپریم کورٹ نے یہ حکم بھی دیا کہ چوہدری محمد سعید 7 ایام کے اندر وضاحت پیش کریں بصورت دیگر ان کے خلاف فوجداری قانون کے تحت کارروائی عمل میں لائی جائے گی۔