مقبوضہ کشمیر کی جدوجہد آزادی میں پوری طرح شریک ہیں اور راہ آزادی میں کسی بھی قربانی سے دریغ نہیں کریں گے، وزیر اعظم آزاد جموں و کشمیر

منگل 5 نومبر 2019 20:16

مظفرآباد ۔ (اُردو پوائنٹ اخبارتازہ ترین - اے پی پی۔ 05 نومبر2019ء) وزیر اعظم آزاد جموںوکشمیر راجہ محمد فاروق حیدر خان نے کہاہے کہ ہم مقبوضہ کشمیر کے حریت پسندوں کی جدوجہد آزادی میں پوری طرح شریک ہیں اور انشاء اللہ ہم راہ آزادی میں کسی بھی قربانی سے دریغ نہیں کریں گے۔ انہوں نے کہا کہ یوم شہدائے جموں کے موقع پر جہاں ہم تحریک آزادی کے شہیدوں کو اپنا سلام عقیدت پیش کرتے ہیں وہاں اس بات کا بھی عہد کرتے ہیں کہ ہم اس مشعل کو ہر صورت فروزاں رکھیں گے جو ان شہیدوں نے اپنے خون سے روشن کی تھی۔

انہوں نے کہا کہ مقبوضہ کشمیر میں بھارتی فوج اور کٹھ پتلی انتظامیہ آزادی اور حریت کا نعرہ بلند کرنے والوںکی آواز کو دبانے کی ناکام کوششوں میں مصروف ہے۔ مقبوضہ علاقے میں اسلامی تہذیب و ثقافت کو مسخ کرنے اور تناسب آبادی کو تبدیل کرنیکی مذموم کوششیں کی جارہی ہیں۔

(جاری ہے)

انہوں نے کہا کہ کشمیریوں کا تعلق ریاست پاکستان سے ہے اور وہ اس کیلئے اپنی کئی نسلیں قربان کر چکے ہیں ۔وادی میں شہید ہونے والے بوڑھوں ، بچوں ، عورتوں کے جنازے سبز ہلالی پرچم میں دفنائے جارہے ہیں ، نہتے کشمیری بھارت کے جدید اسلحے سے لیس فوج کا مردانہ وار مقابلہ کررہے ہیں ۔انہوں نے کہا کہ ہماری آزادی کی منزل قریب آگئی ہے وہ دن بہت جلد آنے والا ہے جب ساری ریاست آزادہو کر پاکستان کا حصہ بنے گی ۔