سموگ سے بچائو کی عوامی آگاہی کے لئے جامع حکمت عملی مرتب کی گئی ہے، ڈاکٹر سہیل احمد

بدھ 6 نومبر 2019 15:07

راولپنڈی (اُردو پوائنٹ اخبارتازہ ترین - اے پی پی۔ 06 نومبر2019ء) رواں ماہ میں سموگ (دھند یا دھواں ) کے خطرات سے نمٹنے کے پیش نظر عوامی آگاہی کے لئے جامع حکمت عملی مرتب کی گئی ہے، سموگ کے انسانی صحت پر ہونے والے اثرات سے بچاؤ کے لئے ضروری ہے کہ بہت زیادہ مشروبات پینے سے اجتناب کیا جائے، جب سموگ میں شہری بازاروں اور پارکوں میں غیرضروری طور پر جانے سے گریز کریں، یہ بات چیف ایگزیکٹو ڈسٹرکٹ ہیلتھ اتھارٹی راولپنڈی ڈاکٹر سہیل احمد نے محکمانہ اجلاس کی صدارت کرتے ہوئے کہی جس میں سموگ آگاہی مہم کے بارے میں تبادلہ خیال کیا گیا۔

ڈپٹی ہیلتھ آفیسر ڈاکٹر تنویر رضوی اور فوکل پرسن برائے سموگ ڈاکٹر محمد علی مرزا بھی اجلاس میں شریک ہوئے۔ڈاکٹر سہیل احمد نے کہا کہ شہریوں کو چاہیئے کہ اپنی گاڑیوں کا معائنہ کرائیں اور اگر گاڑیاں دھواں دے رہی ہوں تو ان کی فوری مرمت کا انتظام کریں، انہوں نے کہا کہ سمو گ کے سیزن میں گھر کے دروازے اور کھڑکیاں بند رکھیں، انہوں نے کہا کہ عوامی آگاہی مہم کے لئے الیکٹرانک اور پرنٹ میڈیا کے ساتھ ساتھ سوشل میڈیا کا بھی بھرپور استعمال کیا جائے ۔

(جاری ہے)

انہوں نے کہا کہ تعلیمی اداروں میں خصوصی آگاہی سیمینارز منعقد کئے جائیں اور سموگ کے سیزن کے دوران چوراہوں اور سڑکوں پر آگاہی بینرز بھی آویزاں کئے جائیں۔