سموگ کو کنٹرول کرنے کے لیے سخت اقدامات کئے جارہے ہیں، صوبائی وزیر ڈاکٹراخترملک

ملتان (اُردو پوائنٹ اخبارتازہ ترین - اے پی پی۔ 08 نومبر2019ء) وزیرتوانائی پنجاب ڈاکٹراخترملک نے کہا ہے کہ صوبے میں سموگ کو کنٹرول کرنے کے لیے سخت اقدامات کئے جارہے ہیں تاکہ اس کے اثرات کو کم کیاجا سکے۔انہوں نے کہا کہ تمام ادارے حکومتی پابندیوں کے نفاذ کے لیے بھرپور کاروائی کریں اور خلاف ورزی کرنے والوں کوسزا دے کر دوسروں کے لیے مثال بنائیں۔

ان خیالات کا اظہار انہوں نے سموگ کے حوالے اجلاس سے خطاب کرتے ہوئے کیا۔ڈپٹی کمشنر عامرخٹک بھی اس موقع پر موجود تھے۔ایم ڈی ویسٹ مینجمنٹ کمپنی ناصرشہزادڈوگر،ماحولیات،صحت، زراعت اور محکمہ پولیس کے افسران نے اجلاس میں شرکت کی۔ وزیرتوانا ئی ڈاکٹراخترملک نے کہا کہ فصلوں کی باقیات جلانے والوں اوردھواں چھوڑنے والی گاڑیوں کے خلاف کاروائی کی جائے۔

(جاری ہے)

اس کے علاوہ آلودگی کے تدارک کے لئے آلات نہ لگانے والے صنعتی اداروں کے خلاف بھی ایکشن لیا جائے۔ انہوں نے کہا کہ عوام کو سموگ کے اثرات سے محفو ظ رہنے کے لیے آگاہی مہم چلائی جائے۔ڈپٹی کمشنر عامر خٹک نے اجلاس سے خطاب کرتے ہوئے کہا کہ ضلع میں 15 نومبر سے تمام بھٹے بند کردیئے جائیں گے۔انہوں نے کہا کہ فصلوں کی باقیات ،ٹائر،پلاسٹک، پولی تھین بیگ اور لیدرجلانے پر دفعہ 144 کے تحت پابندی عائد ہے جس پر سختی عملدرآمد کرایا جائے گا۔

انہوں نے کہا کہ 335 بھٹوں کو بند کرنے کے لیے نوٹس جاری کردئے گئے ہیں۔124 صنعتی اداروں کو بھی نوٹس دے دئے گئے ہیں۔ایم ڈی سالڈ ویسٹ مینجمنٹ کمپنی ناصر شہزاد ڈوگر نے کہا کہ سالڈویسٹ کوآگ لگانے والوں کے خلاف ایکشن لیا جارہا ہے اورکچرے کو آگ لگانے والے شہریوں کو نوٹس جاری کئے جارہے ہیں۔ڈپٹی ڈائریکٹر ماحولیات علی عمران نے بریفنگ دیتے ہوئے بتایا کہ آلودگی اور دھواں پھیلانے والوں کے خلاف 52 ایف آئی آر درج کرائی گئی ہیں۔ملتان شہر میں آجکل ائر کوالٹی انڈکس 70 ہے۔ائر انڈیکس کی خطرناک حد 300 ہے۔سی ای او ہیلتھ ڈاکٹرمنورعباس نے بتایا کہ ضلع کے بنیادی مراکز صحت اور ہسپتالوں میں سموگ ڈیسک قائم کردئے گئے ہیں۔محکمہ صحت کی طرف سے سموگ بارے آگاہی مہم جاری ہے۔