پاکستان کو بنگلہ دیش سے 15 سال بعد پیاز کا درآمدی آرڈر موصول

ہفتہ 9 نومبر 2019 10:30

اسلام آباد ۔ (اُردو پوائنٹ اخبارتازہ ترین - اے پی پی۔ 09 نومبر2019ء) 15 سال بعد پاکستان کو بنگلہ دیش سے پیاز کا درآمدی آرڈر موصول ہوا ہے جس کے تحت پاکستان بنگلہ دیش کو300 ٹن سے زیادہ پیاز برآمد کرے گا۔

(جاری ہے)

ٹریڈ ڈویلپمنٹ اتھارٹی آف پاکستان(ٹی ڈی اے پی) کے حکام نے کہا ہے کہ بنگلہ دیش کی تاشو انٹر پرائزز نے پیاز درآمد کرنے کیلئے کراچی کی ایک پاکستانی کمپنی روشان انٹرپرائزز سے درآمد کیلئے آرڈر کی تصدیق کردی ہے اور اس حوالے سے بنگلہ دیش کو پیاز کی12 کنٹینرز برآمد کئے جائیں گے جس کے بعد مزید برآمدات بھی متوقع ہیں۔

واضح رہے کہ بھارت نے اندورن ملک سبزیوں کی قیمتوں میں اضافہ کے خدشہ کے پیش نظر ہمسایہ ممالک کو سبزیوں کی برآمد پر پابندی عائد کی ہے جس کی وجہ سے بنگلہ دیش نے پیاز درآمد کرنے کیلئے پاکستان سے رابطہ کیا ہے۔ انہوں نے کہا کہ پیاز کے علاوہ دیگر سبزیاں اور پھل بھی بنگلہ دیش کو برآمد کرنے کیلئے اقدامات کئے جارہے ہیں۔