سینٹ سٹینڈنگ کمیٹی برائے سائنس و ٹیکنالوجی کا اجلاس کامسٹس یونیورسٹی اسلام آباد میں منعقد ہوا

سینٹ سٹینڈنگ کمیٹی برائے سائنس و ٹیکنالوجی کا اجلاس سنیٹر مشتاق احمد خان کی زیر صدارت کامسٹس یونیورسٹی کے اسلام آباد کیمپس میں منعقد ہوا

ہفتہ نومبر 13:38

سینٹ سٹینڈنگ کمیٹی برائے سائنس و ٹیکنالوجی کا اجلاس کامسٹس یونیورسٹی ..
اسلام آباد (اُردو پوائنٹ اخبارتازہ ترین۔ 09 نومبر2019ء) سینٹ سٹینڈنگ کمیٹی برائے سائنس و ٹیکنالوجی کا اجلاس سنیٹر مشتاق احمد خان کی زیر صدارت کامسٹس یونیورسٹی کے اسلام آباد کیمپس میں منعقد ہوا۔ اجلاس میں وفاقی وزیر بر ائے سائنس وٹیکنالوجی چوہدری فواد حسین، سنیٹر صابر شاہ، سنیٹر ڈاکٹر سکندر ماہندرو، سنیٹر محمد اسد علی خان جونیجو، ریکٹر کامسٹس یونیوسٹی اسلام آباد، پروفیسر ڈاکٹر راحیل قمر، سیکرٹری ورکرز ویلفیئر فنڈ محمد قاسم سعید اور ہائر ایجوکیشن کمیشن کے ڈی جی فنانس ضیخم علی کے علاوہ ایچ ای سی کے دیگر سینئر عہدیداران نے بھی شرکت کی۔


پروفیسر ڈاکٹر رحیل قمر ریکٹر کامسٹس یونیورسٹی نے سینٹ کمیٹی کویونیورسٹی کے اعلیٰ تعلیم کے شعبے میں کردار اور یونیورسٹی کو درپیش مالی مسائل سے آگاہ کیا جس کی وجہ سے یونیورسٹی ملازمین کی تنخواہیں ادا کرنے اور دیگرمعاملات کی انجام دہی میں یونیورسٹی کو اس وقت مسائل کا سامنا ہے۔

(جاری ہے)

یونیورسٹی ریکٹر نے مالی بحران کے حل کے لیے کئی تجاویز بھی سینٹ کمیٹی کے روبرو پیش کیں جن میں یونیورسٹی کو خود کفیل بنانے کے لیئے یونیورسٹی میں تیار ہونے والی ٹیکنالوجیز کا کمرشل سطح پر فروغ بھی شامل ہے۔


سینٹ کمیٹی کو گزشتہ چند سالوں میں ملک میں جامعات کی تعداد میں غیر معمولی اضافے کے سبب ہائر ایجوکیشن کمیشن کے بجٹ میں مجموعی طور پر بھی تناؤ کے بارے میںآ گاہ کیا گیا۔ اجلاس میں ایچ ای سی کو سفارش کی گئی کہ وہ قائد ِاعظم یونیورسٹی، نسٹ اور کامسٹس یونیورسٹی کو فوری طور پر فنڈز کا اجراء کرے تا کہ حکومت پاکستان کے وژن کے مطابق ان جامعات کا شمار دنیا کی بہترین جامعات میں ہو سکے۔


سینٹ کمیٹی کو ہائر ایجوکیشن کمیشن کے عہدیداران کی جانب سے ورچوئل کیمپس ریگولیشنز کے بارے میں بھی آگاہ کیا گیا جس پر سینٹ کمیٹی نے ایچ ای سی کو ہدایت کی وہ اس بارے میں دسمبر تک پالیسی کا اعلان کرے۔
ورکرز ویلفیئر فنڈ نے سینٹ کمیٹی کے سوال پر بتایا کہ کامسٹس یونیورسٹی اسلام آباد اور لاہور کے تمام واجبات ایک سے دو ماہ میں ادا کر دیئے جائیں گے۔

اجلاس کے اختتام پر سینٹ کمیٹی نے یونیورسٹی کی سینٹرل لائبریری کا دورہ کیا جہاں انھوں نے طلباء سے ملاقات کی اور انھیں اعلیٰ معیار کی تعلیم حاصل کرنے پر زور دیا۔اس کے بعد سینٹ کمیٹی نے کامسٹس یونیورسٹی اسلام آباد کی آرٹ گیلری ، نئے تعمیر ہونے والے پروٹوٹائپ ڈیویلپمنٹ سینٹر اور میڈیکل سینٹر کا دورہ کیا۔ سینٹ کمیٹی نے بہترین معیار کی اعلیٰ تعلیم کی فراہمی پر کامسٹس یونیورسٹی کے کردار کو سراہا۔