مسلسل شکستیں، مصباح الحق پہلی سیریز میں ہی میڈیا سے کترانے لگے

آسٹریلیا سے ٹی 20 سیریز میں ہیڈ کوچ و چیف سلیکٹر نے بھی کسی پریس کانفرنس میں شرکت نہیں کی

Zeeshan Mehtab ذیشان مہتاب ہفتہ نومبر 14:49

مسلسل شکستیں، مصباح الحق پہلی سیریز میں ہی میڈیا سے کترانے لگے
پرتھ(اردو پوائنٹ تازہ ترین اخبار۔9نومبر2019ء) مصباح الحق کے پاس ٹیم کی مسلسل شکستوں کے جواز ختم ہو گئے، وہ میڈیا کا سامنے کرنے سے کترانے لگے۔بورڈ کی میڈیا پالیسی مسلسل تنقید کی زد میں ہے اور آئی سی سی سے آئے ہوئے آفیشل کی جانب سے غیرملکی بورڈز کی تقلید نے بھی معاملات مزید بگاڑ دیے ہیں ،آسٹریلیا سے ٹی 20 سیریز میں مصباح الحق نے بھی کسی پریس کانفرنس میں شرکت نہیں کی، صرف آمد کے بعد ایک بار انھوں نے میڈیا سے بات کی تھی۔

پہلے ٹی 20 سے قبل بابر اور میچ کے بعد رضوان نے پریس کانفرنس سے خطاب کیا، دوسرے میچ سے پہلے کسی پلیئر نے صحافیوں سے گفتگو نہیں کی اور میچ کے بعد افتخار احمد آئے، تیسرے ٹی ٹونٹی سے پہلے وہاب ریاض نے میڈیا سے بات کی تھی۔سیریز گنوانے کے بعد صحافی توقع کر رہے تھے کہ کوچ و چیف سلیکٹر مصباح الحق آکر شکست کی وجوہات بیان کریں گے مگر میڈیا منیجر رضا راشد کپتان بابر اعظم کو لے آئے جو واضح طور پر گھبرائے ہوئے دکھائی دیے، خوش قسمتی سے پاکستان سے صرف ایک اور آسٹریلیا کے چند صحافیوں کی موجودگی کے سبب بہت جلدی پریس کانفرنس ختم ہو گئی۔

(جاری ہے)

واضح رہے کہ ڈائریکٹر میڈیا نے پاکستانی صحافیوں کیلئے پیشہ ورانہ فرائض انجام دینا مشکل بنا دیا ہے، ان کی ہدایت پر کھلاڑیوں کو سات پردوں میں چھپایا جاتا ہے اور خود انٹرویوز کر کے ریلیز کیے جاتے ہیں۔