لاہور ہائیکورٹ : کرکٹر شرجیل خان کا نام ای سی ایل سے نکالنے کا حکم

منگل 12 نومبر 2019 18:34

لاہور۔12 نومبر(اُردو پوائنٹ اخبارتازہ ترین - اے پی پی۔ 12 نومبر2019ء) لاہور ہائیکورٹ نے وزارت داخلہ کو کرکٹر شرجیل خان کا نام ای سی ایل سے نکالنے کا حکم دیدیا۔ عدالت نے سات یوم میں عملدرآمد کی ہدایت کرتے ہوئے درخواست نمٹا دی۔لاہور ہائیکورٹ کے جسٹس ساجد محمود سیٹھی نے کرکٹر شرجیل خان کی درخواست پر سماعت کی۔کرکٹر شرجیل خان کے وکیل شائیگان اعجازچدھڑ نے دلائل دئیے۔

(جاری ہے)

انہوں نے کہا کہ شرجیل خان کاسپاٹ فکسنگ اور میچ فکسنگ سے کوئی تعلق نہیں رہا، شرجیل خان عمرے کی ادائیگی کیلئے سعودی عرب جانا چاہتے ہیں۔ استدعا ہے کہ عدالت شرجیل خان کا نام ای سی ایل سے نکالنے کا حکم دے۔ وزارت داخلہ کے وکیل نے کہا کہ ایف آئی اے کے پاس انکوائری زیرالتواء ہے۔ شرجیل خان کا نام ایف آئی اے کے کہنے پرای سی ایل میں ڈالا گیا۔جس پر عدالت نے وزارت داخلہ کو کرکٹر شرجیل خان کا نام ای سی ایل سے نکالنے کا حکم دیدیا۔