ڈپٹی سپیکر پنجاب اسمبلی سردار دوست محمد مزاری سے ڈیمو کریسی رپورٹنگ انٹرنیشنل کے وفد کی ملاقات

لاہور۔13 نومبر(اُردو پوائنٹ اخبارتازہ ترین - اے پی پی۔ 13 نومبر2019ء) ڈپٹی سپیکر پنجاب اسمبلی سردار دوست محمد مزاری سے ڈپٹی سپیکر خیبر پختون خواہ اسمبلی جان محمد کی سربراہی میں سندھ اسمبلی، خیبر پختون خواہ اسمبلی اور بلوچستان اسمبلی کے ارکین پر مشتمل ڈیمو کریسی رپورٹنگ انٹرنیشنل (ڈی آرآئی)کے وفدنے پنجاب اسمبلی میں ملاقات کی ۔ملاقات کے دوران گفتگو کرتے ہوئے ڈپٹی سپیکر پنجاب اسمبلی سردار دوست محمد مزاری نے کہا کہ ہمیں صوبوں کے درمیان ہم آہنگی پیدا کر کے صوبائی اور لسانی تعصبات سے بالا تر ہو کر عوام کی خدمت کرنی ہے‘ اراکین اسمبلی کو عوام اور ملک کی ترقی کے لیے قانون سازی میں دلچسپی لینی چاہیے۔

انہوں نے کہاکہ ڈیمو کریسی رپورٹنگ انٹرنیشنل کا مقصد سینٹ آف پاکستان ، نیشنل اسمبلی اور چاروں صوبائی اسمبلیوں کے اراکان کا ایک دوسرے کے تجربات سے استفادہ کر کے زیادہ موثر قانون سازی کرنا ہے‘ڈی آر آئی کے منصوبہ سے پنجاب اسمبلی، چاروں صوبوں کے عوام کو ایک دوسرے کے قریب لانے میں اہم کردار ادا کررہی ہے۔

(جاری ہے)

انہوں نے کہا کہ چاروں صوبائی حکومتوں کو تعلیم پرخصوصی توجہ دینا ہو گی کیونکہ تعلیم کے بغیر ملکی ترقی کا خواب شرمندہ تعبیر نہیں ہوسکتا‘ ملک کو درپیش مشکلات سے نکالنے کے لیے ہمیں اتفاق و اتحاد کا مظاہرہ کرنا ہو گا۔

ڈپٹی سپیکرخیبر پختون خواہ جان محمد نے کہا کہ لاہور آمد پر جس محبت کا اظہار کیا وہ اسے کبھی نہیں بھلا سکتے۔ وفد نے پنجاب اسمبلی کا ایوان اور پنجاب اسمبلی کی زیر تعمیر نئی بلڈنگ کا دورہ بھی کیا ۔ ملاقات میں ڈی آر آئی کے نمائندے جاوید احمد ملک‘ سمیہ یوسف، ڈی جی پارلیمانی امور پنجاب اسمبلی عنایت اللہ لک اور ڈپٹی سیکرٹری قانون سازی پنجاب اسمبلی خالد محمود بھی موجود تھے۔