ہم نے میرٹ پر بات کرنا وزیر اعظم عمران خان سے سیکھا ہے، پاکستان تحریک انصاف کی حکومت ملک کے نظام کو ٹھیک کرنے کیلئے آئی ہے،فیصل واوڈا

وفاقی وزیر آبی وسائل فیصل واوڈا کی نجی ٹی وی چینل سے بات چیت

جمعرات 21 نومبر 2019 00:10

اسلام آباد ۔ (اُردو پوائنٹ اخبارتازہ ترین - اے پی پی۔ 21 نومبر2019ء) وفاقی وزیر آبی وسائل فیصل واوڈا نے کہا ہے کہ ہم نے میرٹ پر بات کرنا وزیر اعظم عمران خان سے سیکھا ہے، پاکستان تحریک انصاف (پی ٹی آئی) حکومت ملک کے نظام کو ٹھیک کرنے کیلئے آئی ہے۔ بدھ کو نجی ٹی وی چینل سے بات چیت کرتے ہوئے انہوں نے کہا کہ سابق صدر آصف علی زرداری اگر کراچی سے علاج کروانا چاہتے ہیں تو درخواست دائر کریں۔

(جاری ہے)

وفاقی وزیر نے کہا کہ نیب ایک آزاد اور خود مختار ادارہ ہے، اپوزیشن جو مرضی کر لے بدعنوانی کرنے والوں کے خلاف احتساب کا عمل جاری رہے گا۔ انہوں نے کہا کہ سب کا بلاتفریق احتساب ہونا چاہیے اگر نیب کو لگتا ہے کہ پی ٹی آئی کا کوئی رہنما کرپشن میں ملوث ہے تو وہ اس کے خلاف تحقیقات کرے۔ فیصل واوڈا نے کہا کہ پاک فوج منتخب حکومت کے ساتھ کھڑی ہے۔ انہوں نے کہا کہ پاکستان مسلم لیگ نواز اور پاکستان پیپلز پارٹی نے جمعیت علمائے اسلام (جے یو آئی ف) کے سربراہ مولانا فضل الرحمان کو مذموم مقاصد کیلئے استعمال کیا جس میں انہیں بری طرح ناکامی ہوئی، جے یو آئی غیر جمہوری اقدام سے عوام میں مقبولیت کھو چکی ہے۔