پاکستان میں گیس کی طلب 8 ارب کیوبک فٹ ، رسد 4.3 ارب کیوبک فٹ تک پہنچ گئی

فیصل آباد (اُردو پوائنٹ اخبارتازہ ترین - اے پی پی۔ 21 نومبر2019ء) آل پاکستان ٹیکسٹائل پراسیسنگ ملز ایسوسی ایشن کے ترجمان نے کہاہے کہ پاکستان میں گیس کی طلب 8ارب کیوبک فٹ جبکہ رسد 4.3 ارب کیوبک فٹ تک پہنچ گئی ہے لہٰذاملک میں موجود 5.86کھرب مکعب فٹ گیس اور 9 ارب بیرل تیل کے ذخائر سے فوری استفادہ یقینی بناناہوگا تاکہ انڈسٹریل سیکٹر کو بجلی و گیس کے بحران سے نجات دلا کر صنعت کاپہیہ رواں دواں اور معاشی استحکام برقراررکھاجاسکے۔

میڈیاسے بات چیت کے دوران انہوں نے کہاکہ امریکن انرجی انفارمیشن سنٹر نے جدید ریسرچ اور طویل سروے کی روشنی میں جاری کردہ رپورٹ میں انکشاف کیا ہے کہ پاکستان میں 5.86کھرب مکعب فٹ شیل گیس اور 9ارب بیرل شیل آئل کے ذخائر موجود ہیں جبکہ ہائیڈروجن گیس کے یہ ذخائر اس وقت تک دریافت شدہ تمام ذخائرسے انتہائی زیادہ ہیں۔

(جاری ہے)

انہوںنے بتایاکہ پاکستان اس وقت 4.25 ارب مکعب فٹ گیس اور 70ہزار بیرل تیل روزانہ پیدا کررہاہے جبکہ نئے ذخائر کو قابل استعمال بنا کر توانائی کے بحران سے نجات حاصل کی جاسکتی ہے۔

انہوںنے بتایاکہ تھرکے علاقہ کو اللہ تعالیٰ نے بے شمار معدنیات اور چھپے ہوئے قیمتی خزانوں سے نوازا ہے نیز تھر کول بھی قدرت کا ایک انمول تحفہ ہے جس سے استفادہ کے لئے سنجیدگی کامظاہرہ ضروری ہے۔ انہوں نے کہاکہ اگرچہ حکومت بجلی کا بحران ختم کرنے کے لئے سنجیدہ اقدامات کررہی ہے تاہم گیس کے بحران سے نجات کیلئے بھی جنگی بنیادوں پر اقدامات کو یقینی بناناہو گا۔