منی لانڈرنگ ریفرنس، سابق صدرآصف علی زرداری اور فریال تالپور کے کے جوڈیشل ریمانڈ میں 17دسمبر تک توسیع

منگل 26 نومبر 2019 16:42

اسلام آباد (اُردو پوائنٹ اخبارتازہ ترین - اے پی پی۔ 26 نومبر2019ء) احتساب عدالت نے سابق صدر آصف علی زرداری اور ان کی ہمشیرہ فریال تالپور کے خلاف میگا منی لانڈرنگ ریفرنس میں دونوں کے جوڈیشل ریمانڈ میں 17دسمبر تک توسیع کر دی ہے ۔عدالت نے ملزمان کو آئندہ سماعت تک ریفرنس کی نقول دینے کا حکم دیتے ہوئے سماعت ملتوی کر دی ۔منگل کو احتساب عدالت کے جج محمد اعظم خان نے سماعت کی تو اس موقع پر سابق صدر آصف علی زرداری علالت کے باعث پیش نہ ہوئے جبکہ ان کی ہمشیرہ فریال پالپور عدالت میں پیش ہوئی۔

دوران سماعت پراسیکیوٹر نیب سردار مظفر عباسی بھی پیش ھوئے۔ اس موقع پر فریال تالپور کے وکیل لطیف کھوسہ بھی عدالت میں پیش ہوئے ۔ عدالت نے ملزمان کو ضمنی ریفرنس کی نقول فراہم کرنے کا حکم دیا۔

(جاری ہے)

عدالت نے حکم دیا کہ تمام ملزمان کو ریفرنس کی نقول فراہم کی جائیں، 17 دسمبر سے پہلے تمام ملزمان کو نقول کی فراہمی یقینی بنائی جائے۔نیب پراسیکوٹر نے موقف اختیار کیا کہ ہم نے سپلیمنٹری ریفرنس دائر کر دیا ہے،ریفرنس سکروٹنی کے مرحلے میں ہے، ریفرنس کے 65 والیم ہیں، ملزمان کی تعداد وہی ہے، مزید شواہد شامل کیے گئے ہیں۔عدالت نے جعلی بنک اکاؤنٹس میگا منی لانڈرنگ کیس میں فریال تالپور اور آصف علی زرداری کے جوڈیشل ریمانڈ میں اور پارک لین ریفرنس میں سماعت 17 دسمبر ملتوی کر دی۔