حکومت کو رواں مالی سال کے اختتام تک 24 ارب ڈالرز حاصل ہونے کا امکان

پاکستان کی برآمدات میں 9.6 فیصد اضافہ، جولائی سے نومبر 2019 کے دوران ملکی برآمدات 9.55 ارب ڈالر رہیں، موجودہ ٹرینڈ برقرار رہا تو اگلے برس کے وسط تک برآمدات ریکارڈ سطح تک پہنچ جائیں گی

پیر 2 دسمبر 2019 23:28

کراچی (اُردو پوائنٹ اخبارتازہ ترین۔ 02 دسمبر2019ء) حکومت کو رواں مالی سال کے اختتام تک 24 ارب ڈالرز حاصل ہونے کا امکان، پاکستان کی برآمدات میں 9.6 فیصد اضافہ، جولائی سے نومبر 2019 کے دوران ملکی برآمدات 9.55 ارب ڈالر رہیں، موجودہ ٹرینڈ برقرار رہا تو اگلے برس کے وسط تک برآمدات ریکارڈ سطح تک پہنچ جائیں گی۔ تفصیلات کے مطابق نومبر 2019 کے دوران پاکستان کی برآمدات 9.6 فیصد اضافے کے ساتھ 2.02 ارب ڈالر تک پہنچ گئیں جبکہ اسی دورانیے میں درآمدات میں 17.53 فیصد کمی ہوئی اور یہ 3.8 ارب ڈالر رہیں۔

وزارت تجارت کی جانب سے فراہم کیے گئے اعداد و شمار کے مطابق نومبر 2018 میں 1.843 ارب ڈالر کی برآمدات جبکہ 4.626 ارب ڈالر کی درآمدات کی گئی تھیں۔جولائی سے نومبر 2019 کے دوران ملکی برآمدات 9.55 ارب ڈالر رہیں جبکہ گزشتہ سال اسی عرصے میں 9.113 ارب ڈالر کی برآمدات کی گئی تھیں۔

(جاری ہے)

اس طرح اس دورانیے میں 43.7 کروڑ ڈالر یا 4.8 فیصد برآمدات میں اضافہ ہوا جبکہ درآمدات میں 19.27 یعنی 4.546 ارب ڈالر کی کمی ہوئی۔گزشتہ سال اسی عرصے میں 23.59 ارب ڈالر کی درآمدات کی گئی تھیں۔اسی طرح اس دورانیے میں پاکستان کے تجارتی خسارے میں بھی 34.4 فیصد کمی ہوئی ہے۔