سلیمان شہباز نے شہزاد اکبر کو ’جاہل‘ قرار دیدیا

ٴْشہزاد اکبر نجی کاروبار کو بدنام کرکے سستی شہرت حاصل کرنے کی کوشش کر رہے ہیں۔سلیمان شہباز

جمعہ 6 دسمبر 2019 20:35

سلیمان شہباز نے شہزاد اکبر کو ’جاہل‘ قرار دیدیا

لندن(اُردو پوائنٹ اخبارتازہ ترین - آن لائن۔ 06 دسمبر2019ء) قومی اسمبلی میں قائد حزب اختلاف اور مسلم لیگ (ن) کے صدر شہباز شریف کے صاحبزادے سلیمان شریف نے معاون خصوصی برائے احتساب و داخلہ شہزاد اکبر کے الزامات کو مسترد کرتے ہوئے انہیں جاہل قرار دے دیا۔گزشتہ روز وزیراعظم کے معاون خصوصی برائے احتساب و داخلہ شہزاد اکبر نے پریس کانفرنس میں شہبازشریف فیملی کے خلاف نیا پنڈورا باکس کھولا جس میں انہوں نے بتایا کہ قومی احتساب بیورو (نیب) کی تحقیقات کے مطابق شہباز شریف کے اثاثوں میں 10 سال کے دوران 70 گنا اضافہ ہوا، حمزہ اور سلمان شہباز کے اثاثوں میں بھی ہوشربا اضافہ ہوا ہے۔

ان الزامات پر برہمی کا اظہار کرتے ہوئے سلیمان شریف نے سماجی رابطے کی سائٹ ٹوئٹر پر اپنی ایک ٹوئٹ میں لکھا کہ شہزاد اکبر نے ایک لفظ نہیں کہا کہ سرکاری خزانے میں کہاں کرپشن کی گئی ہے۔

(جاری ہے)

سلیمان شریف کا کہنا تھا کہ شہزاد اکبر نجی کاروبار کو بدنام کرکے سستی شہرت حاصل کرنے کی کوشش کر رہے ہیں۔ادھر مسلم لیگ ن کے رہنما احسن اقبال نے بھی شہزاد اکبر کی پریس کانفرنس پر سخت ردعمل دیتے ہوئے کہا کہ عوام کی توجہ ہٹانے کے لیے نام نہاد احتساب سیل نے پریس کانفرنس کی تھی۔احسن اقبال کا کہنا تھا کہ قائد حزب اختلاف پر جھوٹے الزام لگائے گئے ، لگتا ہے کہ یہ حکومت نہیں کوئی مزاحیہ تھیٹر ہے حالانکہ سپریم کورٹ میں حکومت اور نیب نے شہباز شریف کے خلاف کوئی ثبوت پیش نہیں کیے۔