زیرو کشش ثقل کینسر کے خلیات کو مار دیتی ہے

سڈنی (اُردو پوائنٹ اخبارتازہ ترین - اے پی پی۔ 10 دسمبر2019ء) آسڑیوی سائنسدانوں نے کینسر کے خلیئے پر ایک تحقیق کے دوران تجربے میں جبکینسر کے خلیات کو ایک دن کے لیے زیرو کشش ثقل میں رکھا تو کینسر کے 80 فیصد خلیئے مردہ ہو گئے ، سائنسدانوں نے فیصلہ کیا ہے اب اس سلسلے کے نئے تجربات خلا میں کیے جائیں گے۔ قبل ازیں جرمن محقیقن نے بھی ایسے ہی نتائج اخذ کیے تھے۔

آسٹریلوی سائنسدان کینسر کے خلیات کو اب خلاء میں بھیجنے کا منصوبہ بنا رہے ہیں۔ زمین پر کشش ثقل کو ختم کرتے ہوئے جو تجربات کیے گئے ہیں، ان کے حیران کن نتائج سامنے آئے ہیں۔ سڈنی کی یونیورسٹی آف ٹیکنالوجی میں بائیو میڈیکل انجینئیرنگ ریسرچ کے شعبے سے وابستہ پروفیسر جوشو چاؤ کا ڈی ڈبلیو سے گفتگو کرتے ہوئے کہنا تھا کہ میرے اردگرد بہت سے لوگوں کو کینسر ہوا، تو میں نے اسی وقت ارادہ کر لیا تھا کہ میں سرطان کے خلیات پر تحقیق کروں گا۔

(جاری ہے)

پروفیسر جوشو چاؤ کے مطابق وہ ایک طویل عرصے سے زیرو گریویٹی (صفر کشش ثقل) میں کینسر کے خلیات کی کارکردگی کا جائزہ لیتے رہے ہیں۔ قبل ازیں ان کی تحقیق خلاء میں ہڈیوں کو پہنچنے والے نقصان سے متعلق تھی۔ان کا مزید کہنا تھا کہ ابھی تک ایسی کوئی جادوئی دوا تیار نہیں کی جا سکی کہ جو کینسر کو ختم کر دے کیوں کہ کینسر کی مختلف اقسام ہوتی ہیں اور ہر ایک شخص کا اس کے خلاف ردعمل مختلف ہوتا ہے۔