صدرمملکت ڈاکٹر عارف علوی کا تھیلیسیمیاکے مرض کی بروقت تشخیص احتیاطی تدابیر اور علاج پر زور

اسلام آباد (اُردو پوائنٹ اخبارتازہ ترین - این این آئی۔ 19 دسمبر2019ء) صدرمملکت ڈاکٹر عارف علوی نے تھیلیسیمیاکے مرض کی بروقت تشخیص احتیاطی تدابیر اور علاج پر زور دیتے ہوئے کہا ہے کہ میڈیا اور مساجد کے ذریعے معاشرے میں آگاہی پیدا کرکے اس مرض کو پھیلنے سے روکا جاسکتا ہے۔ راولپنڈی میڈیکل یونیورسٹی میں 14 ویں نیشنل تھیلیسیمیا کانفرنس اینڈ ورکشاپ سے خطاب کرتے ہوئے صدر عارف علوی نے کہا کہ تھیلیسیمیا کے سد باب کے لئے ہر ممکن اقدامات کرنے ہوں گے،تھیلیسییمیا کے مرض کی روک تھام کے حوالے ایران کی مثال ہمارے سامنے ہے۔

وزیر اعظم نے بھی شعبہ صحت کو اولین ترجیح دی ہے،صحت کے شعبہ کا بجٹ بڑھایا گیا کم نہیں کیا گیا۔ انہوں نے کہا کہ پاکستان میں تھیلیسیمیا کے ایک لاکھ مریض ہیں۔

(جاری ہے)

تھیلیسیمیا کے مریضوں کی فلاح کے لئے کام کرنا نیک عمل ہے۔ صدر مملکت نے کہا کہ احتیاطی تدابیر سے تھیلیسیمیا کے مرض کو روکا جاسکتا ہے،معاشرے میں تھیلیسیمیا کے مریضوں کی فلاح کے لئے اقدامات کرنے ہوں گے۔

صدر مملکت نے کہا کہ معاشرے میں آگہی مہم سیتھیلیسیمیا کے مرض پر قابو پایا جاسکتا ہے۔ انہوںنے کہاکہ قانون سے بنانے سے زیادہ اس کا نفاذ اہم ہے،ہیپاٹائٹس کی مرض کی روک تھام کے لئے بھی اقدامات کئے جانے چاہئیں۔ صدر نے کہا کہ پاکستانیوں میں خیرات اور عطیات دینے کا بڑا جذبہ ہے ‘ مخیر حضرات تھیلیسیمیا کے مرض کی روک تھام کے لئے خیرات اور عطیات کے ذریعے اس کار خیر میں بھرپور حصہ ڈالیں۔

انہوں نے کہا کہ قوم میں اس مرض کی تشخیص احتیاطی تدابیر اور علاج سے متعلق آگاہی پیدا کرنے کی ضرورت ہے، معاشرے میں میڈیا اور مساجد کا اہم کردار ہے۔ انہوں نے کہا کہ تھیلیسیمیا سے فوت ہونے والے عثمان کو آئندہ 23مارچ کو صدارتی ایوارڈ دیا جائیگا کیونکہ اس نے نہ صرف خود اس بیماری کا بہادری سے مقابلہ کیا بلکہ تھیلیسیمیا کے دیگرمریضوں کی مدد بھی کی۔ تقریب سے وزیراعظم کے معاون خصوصی برائے قومی ہیلتھ سروسز ریگولیشنز اینڈ کوآرڈینیشن ڈاکٹر ظفر مرزا ‘ صوبائی وزیر صحت پنجاب یاسمین راشد‘ پاکستان بیت المال کے منیجنگ ڈائریکٹر عون عباس بپی اور صدر تھیلیسیمیا فائونڈیشن پاکستان لیفٹیننٹ جنرل معین الدین حیدر نے بھی خطاب کیا۔