وزیراعلیٰ پنجاب تھیلیسیمیا کی مریض طالبہ آمنہ محمود کی آواز بن گئے، تعلیم کے اخراجات اٹھانے کا اعلان

آمنہ جہاں تک چاہے تعلیم حاصل کرے، حکومت پنجاب پوری معاونت کریگی،عثمان بزدار

جمعرات 23 جنوری 2020 18:51

وزیراعلیٰ پنجاب تھیلیسیمیا کی مریض طالبہ آمنہ محمود کی آواز بن گئے، ..

لاہور۔23 جنوری(اُردو پوائنٹ اخبارتازہ ترین - اے پی پی۔ 23 جنوری2020ء) وزیراعلیٰ پنجاب سردار عثمان بزدار تھیلیسیمیا کی مریض طالبہ آمنہ محمود کی آواز بن گئے۔ وزیراعلیٰ نے طالبہ آمنہ محمود کی تعلیم کے اخراجات اٹھانے کا اعلان کرتے ہوئے کہا کہ پنجاب حکومت آمنہ محمود کے تعلیمی اخراجات برداشت کریگی، آمنہ جہاں تک چاہے تعلیم حاصل کرے، حکومت پنجاب پوری معاونت کریگی۔

(جاری ہے)

وزیراعلیٰ عثمان بزدار نے جمعرات کے روز تھیلیسیمیا اینڈ بون میرو ٹرانسپلانٹ سینٹر بہاولپور کے دورے کے دوران تھیلیسیمیا کی مریض طالبہ آمنہ محمود کی عیادت کی۔ گورنمنٹ صادق ماڈل گرلز ہائی سکول بہاول پور میں زیر تعلیم میٹرک کی طالبہ آمنہ محمود نے وزیر اعلیٰ عثمان بزدار سے کہا کہ وہ مزید تعلیم حاصل کرنا چاہتی ہے لیکن وسائل اجازت نہیں دیتے، جس پر وزیر اعلیٰ عثمان بزدار نے باہمت طالبہ کی حوصلہ افزائی کی اور کہا کہ بیٹی آمنہ ! آپ کے تعلیمی اخراجات حکومت پنجاب برداشت کرے گی۔ وزیراعلیٰ عثمان بزدار نے اسی وقت آمنہ کی خواہش پر متعلقہ حکام کو ہدایات دیں اورکہا کہ آمنہ میری اپنی بیٹیوں کی طرح ہے، اس کو زیور تعلیم سے آراستہ کرنا میرا فرض ہے۔