افغانستان ، فٹبال میچ پر بھائی نے بھائی کو قتل کردیا

ایک بھائی بارسلونا اور دوسرا ویلینشیا کا مداح تھا اور معمولی تکرار پر خونی جھگڑا ہوگیا

Zeeshan Mehtab ذیشان مہتاب پیر 27 جنوری 2020 16:48

افغانستان ، فٹبال میچ پر بھائی نے بھائی کو قتل کردیا
کابل(اردو پوائنٹ تازہ ترین اخبار۔ 27جنوری 2020ء ) افغانستان میں اپنی اپنی پسندیدہ ٹیموں کے میچ کے دوران ہونے والی تکرار پر ایک بھائی نے دوسرے بھائی کو چھریوں کے وار کر کے قتل کر دیا۔افغان میڈیا کے مطابق سپین میں ہونے والی فٹبال لیگ میں بارسلونا اور ویلینشیا کے درمیان میچ تھا۔ صوبہ کاپیسا کے دو بھائی اپنی اپنی پسندیدہ ٹیم کے لیے پر جوش تھے۔

میچ دیکھنے کے دوران اپنی ٹیموں کی حمایت کے لیے حد سے گزرنے والے بھائیوں میں ہونے والی تکرار جھگڑے میں تبدیل ہوگئی۔

(جاری ہے)

اس موقع پر غصے سے بپھرے ہوئے ایک بھائی نے اپنے ہی جوان سال بھائی امین آغا کو تیز دھار چھریوں کے پہ در پہ وار کر کے قتل کر دیا اور جائے وقوعہ سے فرار ہو گیا۔ ہمسائے چیخ پکار سن کر پہنچے تو قاتل فرار ہوچکا تھا۔ مقتول کو مقامی ہسپتال لے جایا گیا جہاں موت کی تصدیق کردی گئی۔

پولیس نے قتل کا مقدمہ درج کرکے ملزم کی تلاش میں چھاپہ مار کارروائی کا آغاز کر دیا ہے۔ ویلینشیا نے تو یہ میچ 2 کے مقابلے میں صفر گول سے جیت لیا لیکن اس دوران ایک جذباتی مداح قاتل اور دوسرا مقتول بن گیا۔