تحریک انصاف کے نظریاتی رہنما نے اپنی علیحدہ سیاسی جماعت بنا لی

کراچی(اُردو پوائنٹ اخبارتازہ ترین۔ 14 فروری2020ء) لوگ آج پی ٹی آئی سے غیر مطمئن ہو رہے ہیں۔ میں تو کئی برس پہلے ہی تحریک انصاف سے مایوس ہوگیا تھا۔ عام لوگ اتحاد کے چیئرمین جسٹس (ر) وجیہ الدین نے یہ باتیں لیاری میں منعقدہ ٹیلنٹ شو 2020ء کے موقع پر خطاب کرتے ہوئے کہیں۔ انہوں نے کہا کہ میں نے عروج کے دنوں میں پارٹی چھوڑ دی تھی۔ ایسے وقت میں علیحدہ ہوا جب مجھے ممنون حسین کے مقابلے میں صدارتی امیدوار نامزد کیا گیا تھا۔

خواہشات اور امیدیں تو پی ٹی آئی سے وابستہ تھیں۔ لیکن ان سب کو بے کار سمجھا اور محسوس کیا کہ یہ دھوکے بازی کی سیاست ہے۔ اس میں ہمارا کوئی حصہ نہیں۔ اب ایک سیاسی پارٹی بنائی ہے، جس کا نام عام لوگ اتحاد ہے۔ قوم اس سیاسی جماعت سے بڑی امیدیں وابستہ کرسکتی ہے، کیونکہ اس میں قابلیت ہے۔

(جاری ہے)

عام لوگ اتحاد تھوڑے ہی عرصے میں مثبت انداز میں سامنے آئے گا۔

انہوں نے شرکا کو یقین دلایا کہ تعلیمی کاز کیلئے وہ حاضر خدمت ہیں۔ اساتذہ کا بندوبست، مالی معاملات، اسکول کے احاطے کی تزئین و آرائش سمیت تعلیم سے متعلق جو بھی کام ہیں، ان میں بھرپور حصہ ڈالیں گے۔ میں اپنی بلوچ آبادیوں میں زبردست ٹیلنٹ دیکھتا ہوں۔ تعلیم، کھیل، باکسنگ، سائیکلنگ سمیت کون سا شعبہ ہے جس میں بلوچ آگے نہیں۔ انہوں نے شرکا کو بتایا کہ حال ہی میں حیدر آباد سے واپس آتے ہوئے وہ ایک بلوچ آبادی میں کچھ دیر ٹھہرے۔

وہاں بلوچ دوستوں نے بہت بہترین شاعری سنائی۔ جبکہ ایک بلوچ بھائی نے شاندار تقریر کرتے ہوئے کہا کہ ہمیں آپ سے کچھ نہیں چاہیئے۔ ہمیں آپ صرف تعلیم دے دیں۔ انہوں نے کہا کہ حکومت سندھ کا کافی بڑا تعلیمی بجٹ ہے، لیکن یہاں گھوسٹ اسکول اور گھوسٹ اساتذہ موجود ہیں۔ میری فیملی دہلی کی ہے۔ قیام پاکستان کے بعد جیسے تیسے یہاں آئے۔ میرے دادا زیادہ پڑھے لکھے نہیں تھے، مگر انہوں نے اپنے بچوں کو اعلیٰ تعلیم دلاوائی۔

قیام پاکستان کے وقت جب ہندو مسلم فسادات کے نتیجے میں ان کے دونوں گھر ٹوٹ گئے تو لگا سب ختم ہوگیا۔ تاہم تعلیم کی بدولت دوبارہ اپنے پیروں پر کھڑے ہوگئے۔ اسی لئے تعلیم بہت ضروری ہے۔ انہوں نے کہا کہ لیاری کیلئے عام لوگ اتحاد بڑا کام کرنا چاہتا ہے، جو چند ہی روز میں سامنے آجائے گا۔ اسی طرح بالائی سندھ میں ایسا تعلیمی ادارہ قائم کرنے کا منصوبہ ہے جو سندھ مدرسہ الاسلام طرز کا ہو۔ انشاء اللہ مل کر کام کریں گے اور پیسے اور سرمائے کا جو کنٹرول ہے اس سے قوم کو آزادی دلائیں گے۔