ضلع سیالکوٹ میں تین روزہ قومی انسداد پولیو مہم کا افتتاح

سیالکوٹ (اُردو پوائنٹ اخبارتازہ ترین - اے پی پی۔ 17 فروری2020ء) صوبائی وزیر برائے سپیشل ایجوکیشن پنجاب چودھری محمد اخلاق نے سیالکوٹ کے علاقے حبیب پورہ میں واقع خانہ بدوشوں کی جھونپڑ بستی میں قائم محکمہ صحت کے انسداد پولیو کیمپ کا دورہ کیا اور خانہ بدوشوں کے بچوں کو اپنے ہاتھوں سے پولیو سے بچائو کے قطرے پلائے۔ضلع سیالکوٹ میں تین روزہ قومی انسداد پولیو مہم کا افتتاح کرتے ہوئے چودھری محمد اخلاق نے کہا کہ وطن عزیز سے پولیو کے خاتمے کیلئے محکمہ صحت کو جنگی بنیادوں پر کام کرنا ہوگا جبکہ اس ضمن والدین کے بھی ذمہ داری ہے کہ وہ اپنے بچوں کو عمر بھر کی معذوری سے بچانے کیلئے پولیو ٹیموں سے تعاون کریں اور اپنے بچوں کو پولیو سے بچائو کے قطرے ضرور پلائیں۔

اس موقع پر سی ای او ضلعی ہیلتھ اتھارٹی ڈاکٹر اصغر علی اور ڈی او ہیلتھ ڈاکٹر افضل بھلی نے صوبائی وزیر کو بتایا کہ ضلع سیالکوٹ میں شروع کی جانے والی تین روزہ قومی انسداد پولیو مہم کے دوران ضلع سیالکوٹ میں ساڑھے چھ لاکھ سے زائد بچوں کو پولیو سے بچائوکے قطرے پلائے جائیں گے۔

(جاری ہے)

اس قومی مہم کو کامیاب بنانے کیلئے محکمہ صحت سیالکوٹ کی 1120موبائل ٹیمیں گھر گھر جاکر، 132فکسڈ ٹیمیں دیہی و بنیادی مراکز صحت ، ڈسپنسریوں اور ہسپتالوں میں جبکہ 68رومنگ/ٹرانزٹ ٹیمیں ریلوے اسٹیشن، لاری اڈوں، اہم چوکوں اور بازاروں میں بچوں کو پولیو سے بچائو کے حفاظتی قطرے پلائیں گی۔

مہم کے باقاعدہ آغاز سے ایک روز قبل آج ضلع سیالکوٹ کی 92یونین کونسلز میں واقع 1266جھگیوں،بھٹہ خشت ،خانہ بدوشوں اور افغان بستیوں میں رہائش پذیر9ہزار448 رجسٹرڈ بچوں کو کور کیا جائے گا جبکہ اس مہم کو کامیاب بنانے کیلئے تحصیل کی سطح پر اسسٹنٹ کمشنر ز اور ڈی ڈی ایچ اوز کے علاوہ 126یوسی ایم او، 243ایریا انچارجز مانیٹرنگ کریں گے جبکہ عالمی اداروں صحت کی ٹیمیں پری /پوسٹ مہم کی ایویلوایشن کریں گے۔