پاکستان کا جدید ٹیکنالوجی سے لیس کروز میزائل رعد ٹو کا کامیاب تجربہ

کروز میزائل رعد ٹو 600 کلو میٹر تک جانے کی صلاحیت رکھتا ہے، آئی ایس پی آر صدر ، وزیراعظم، چیئرمین جوائنٹ چیفس آف اسٹاف کمیٹی اور سروسز چیفس نے سائنسدانوں اور انجینئرز کو میزائل کے کامیاب تجربے پر مبارکباد دی

منگل 18 فروری 2020 21:13

پاکستان کا جدید ٹیکنالوجی سے لیس کروز میزائل رعد ٹو کا کامیاب تجربہ

راولپنڈی (اُردو پوائنٹ اخبارتازہ ترین - این این آئی۔ 18 فروری2020ء) پاکستان نے جدید ٹیکنالوجی سے لیس کروز میزائل رعد ٹو کا کامیاب تجربہ کرلیا۔پاک فوج کے شعبہ تعلقات عامہ (آئی ایس پی آر) کی جانب سے جاری بیان کے مطابق کروز میزائل رعد ٹو 600 کلو میٹر تک جانے کی صلاحیت رکھتا ہے۔آئی ایس پی آر کے مطابق میزائل جدید ترین ٹیکنالوجی سے لیس ہے جس میں نیوی گیشن کا بہترین نظام ہے جو اہداف کو بہترین انداز سے نشانہ بنانے کو یقینی بناتا ہے۔

(جاری ہے)

آئی ایس پی آر کے مطابق میزائل تجربے کے دوران ڈائریکٹر جنرل اسٹریٹجک پلانز ڈویژن لیفٹیننٹ جنرل ندیم زکی، چیئرمین نیسکام ڈاکٹر نبیل حیات ملک سمیت سینئر افسران موجود تھے۔اس موقع پر ڈائریکٹر جنرل اسٹریٹجک پلانز ڈویژن نے سائنسدانوں اور انجینئروں کی تکنیکی صلاحیت، لگن اور عزم کی تعریف کی۔ انہوں نے میزائل کے کامیاب تجربے کو پاکستان کی صلاحیتوں کی تکمیل کی سمت ایک بڑا قدم بھی قرار دیا۔ اس کے علاوہ صدر ، وزیراعظم، چیئرمین جوائنٹ چیفس آف اسٹاف کمیٹی اور سروسز چیفس نے سائنسدانوں اور انجینئرز کو میزائل کے کامیاب تجربے پر مبارکباد دی ہے۔