چین سے تجارت پر قومی سلامتی کا عذر پیش نہ کیا جائے، ڈونلڈ ٹرمپ

واشنگٹن (اُردو پوائنٹ اخبارتازہ ترین - اے پی پی۔ 19 فروری2020ء) امریکہ کے صدر ڈونلڈ ٹرمپ نے اس تجویز پر شدید ناراضگی کا اظہار کیا ہے جس میں کہا گیا تھا کہ قومی سلامتی کے پیشِ نظر امریکہ چین کو جیٹ طیاروں کے انجن سمیت دیگر پرزہ جات فروخت نہیں کر سکتا۔، انہوں نے کہا کہ وہ اپنی حکومت کو ہدایت دے چکے ہیں کہ قومی سلامتی کا معاملہ ان پر لاگو نہ کریں۔

(جاری ہے)

متعدد ٹویٹس اور صحافیوں سے گفتگو کرتے ہوئے صدر ٹرمپ نے کہا کہ امریکی مصنوعات کو غیر ملکی ممالک کو فروخت کرنے کے لیے قومی سلامتی کے خدشات کو عذر کے طور پر پیش نہیں کرنا چاہیے، اس عمل سے ممالک کو امریکی مصنوعات خریدنے میں مشکل پیش آتی ہے۔صدر ٹرمپ کا یہ بیان ایسے موقع پر سامنے آیا ہے جب یہ خبریں گردش کر رہی تھیں کہ امریکی حکومت نے چین کو مسافر طیاروں کے مزید انجن فروخت کرنے سے مقامی کمپنی جنرل الیکٹرک کارپوریشن کو روکنے پر غور شروع کر دیا ہے۔ صدر ٹرمپ نے کہا کہ وہ قومی سلامتی کے خدشات پر اقتصادی فوائد کو ترجیح دیں گے۔انہوں نے ایک ٹویٹ میں کہا کہ کاروبار کے لیے امریکہ کے دروازے کھلے ہیں۔