شہباز شریف سے واپسی کی تاریخ پوچھی جائے یا نئے اپوزیشن لیڈر کے چناؤ کا آغاز کیا جائے‘ فواد چوہدری

شہباز شریف نواز شریف کو واپس لانے کی گارنٹی دے کر خود ہی غائب ہیں انکی غیر موجودگی اسمبلی قوانین کی خلاف ورزی ہے، ٹوئٹ

جمعہ 21 فروری 2020 21:45

شہباز شریف سے واپسی کی تاریخ پوچھی جائے یا نئے اپوزیشن لیڈر کے چناؤ ..

اسلام آباد(اُردو پوائنٹ اخبارتازہ ترین - آن لائن۔ 21 فروری2020ء) وفاقی وزیر برائے سائنس اینڈ ٹیکنالوجی فواد چوہدری نے کہا ہے کہ شہباز شریف سے وطن واپسی کی حتمی تاریخ پوچھی جائے یا پھر نئے اپوزیشن لیڈر کے چناؤ کا آغاز کیا جائے۔فواد چوہدری نے سوشل میڈیا پر اپنے ٹوئٹ میں بتایا کہ انہوں نے اسپیکر قومی اسمبلی کو خط لکھا ہے کہ اپوازیشن لیڈر طویل عرصے سے ایوان میں تشریف نہیں لا رہے اور پبلک اکاؤنٹس کمیٹی کا عہدہ وہ پہلے چھوڑ چکے ہیں۔

(جاری ہے)

انہوں نے کہا کہ قانون سازی میں اپوزیشن لیڈر کا اہم کردار ہے اور وہ خصوصی مراعات بھی لے رہے ہیں، شہباز شریف کی غیر موجودگی اسمبلی قوانین کی خلاف ورزی ہے۔فواد چوہدری نے مزید لکھا کہ ان حالات میں یا تو شہباز شریف سے اسمبلی میں واپسی کی حتمی تاریخ پوچھی جائے اور یا پھر نئے اپوزیشن لیڈر منتخب کرنے کے لیے پراسسس کا آغاز کیا جائے کیونکہ قائد حزب اختلاف کا عہدہ لمبا عر صہ خالی نہیں رکھا جا سکتا۔وفاقی وزیر برائے سائنس اینڈ ٹیکنالوجی نے کہا کہ شہباز شریف نواز شریف کو واپس لانے کی گارنٹی دے کر خود ہی غائب ہیں۔خیال رہے کہ شہباز شریف نواز شریف کے علاج کے سلسلے میں گزشتہ برس نومبر سے برطانیہ میں مقیم ہیں اور اگلے ماہ ان کی وطن واپسی کا امکان ہے۔