بیسٹ وے سیمنٹ کے منافع میںرواں مالی سال کے دوران 93.9 فیصدکمی

اسلام آباد (اُردو پوائنٹ اخبارتازہ ترین - آن لائن۔ 24 فروری2020ء) بیسٹ وے سیمنٹ کے بعد از ٹیکس منافع میں رواں مالی سال کے دوران 93.9 فیصد جبکہ فوجی سیمنٹ کی خالص آمدنی میں 73.6 فیصد کمی ہوئی ہے۔پاکستان سٹاک ایکسچینج (پی ایس ایکس) کو بھیجے گئے کمپنیز کے مالیاتی اعدادو شمار کے مطابر جاری مالی سال کی پہلی ششماہی میں جولائی تا دسمبر 2019 بیسٹ وے سیمنٹ کی بعد از ٹیکس آمدنی 421 ملین روپے تک کم ہوگئی جبکہ گزشتہ مالی سال میں جولائی تا دسمبر 2018 کمپنی کو 6881 ملین روپے کی خالص آمدنی ہوئی تھی۔

اس طرح گزشتہ مالی سال کے مقابلہ میں رواں مالی سال کے ابتتدائی چھہ ماہ کے دوران بیسٹ وے سیمنٹ کے بعد از ٹیکس منافع میں 6460 ملین روپے یعنی 932.9 فیصد کی کمی ریکارڈ کی گئی ہے جس کے باعث کمپنی کی فی حصص آمدن بھی 11.54 روپے کے مقابلہ میں 0.71روپے فی حصص تک کم ہوگئی۔

(جاری ہے)

پی ایس ایکس کی رپورٹ کے مطابق جاری مالی سال کی پہلی ششماہی کے دوران فوجی سیمنٹ کی خالص آمدنی میں 73.6 فیصد کمی سے کمپنی کا بعد از ٹیکس نفع 482 ملین روپے تک کم ہوگیا جبکہ گزشتہ مالی سال کے اس وجہ کے دوران فوجی سیمنٹ کی بعد از ٹیکس آمدنی 1824 ملین روپے رہی تھی۔

اس طرح گزشتہ مالی سال کے مقابلہ میں دوران مالی سال کے پہلے چھ ماہ کے دوران فوجی سیمنٹ کے بعد از ٹیکس نفع میں 1342 ملین روپے یعنی 73.6 فیصد کی کمی ریکارڈ کی گئی ہے جس کے باعث کمپنی کی فی حصص آمدن بھی 1.32 روپے کے مقابلہ میں 0.35 روپے فی حصص تک کم ہو گئی۔