پاکستانی حکام سے کہا کہ میرا ٹیسٹ کریں مگر سسٹم ہی نہیں ہے

اسلام آباد (اردو پوائنٹ اخبار تازہ ترین 27 فروری 2020) : ایڈیپینڈنٹ اردو سے بات کرتے ہوئے چین سے واپس پاکستان پہنچنے والے پاکستانی طالب علم صدیق شاہد کا کہنا ہے کہ میں چائنہ یونیورسٹی آف پیٹرولیم میں پی ایچ ڈی کا طالب علم ہوں۔ انھوں نے بتایا کہ کرونا وائرس کے حوالے چین میں بہت زیادہ خوف و حراس ہے، جب آپ اپنی روز مرہ کی جگہوں پر لوگوں کو بیماری کی وجہ سے گرتے ہوئے دیکھتے ہیں تو خوف کا عالم بہت زیادہ ہوتا ہے۔

انکا کہنا ہے کہ پاکستانی حکام سے کہا کہ میرا ٹیسٹ کریں مگر سسٹم ہی نہیں ہے، ایئر پورٹ پر حکام سے درخواست کی میرا ٹیسٹ کیا جائے یا کم سے کم علیحدہ رکھا جائے لیکن میری کی نہ سنی گئی۔ دوسری جانب چین میں کرونا وائرس کے اثرات کم ہونے لگے، ایک ماہ کے دوران گزشتہ روز سب سے کم 29 ہلاکتیں ہوئیں جبکہ 433 نئے کیس سامنے آئے ہیں۔

(جاری ہے)

چین میں کرونا سے اب تک 2 ہزار 744 افراد ہلاک ہو چکے ہیں۔ سعودی عرب نے بیرون ملک سے عمرہ زائرین کا داخلہ عارضی طور پر روک دیا، غیرملکی سیاحوں کے ویزے بھی معطل کر دیئے گئے۔ میڈیارپورٹس کے مطابق چین میں کرونا وائرس سے مزید 29 افراد ہلاک ہو گئے، حکام کے مطابق گزشتہ ایک ماہ کے دوران یہ ایک روز میں سب سے کم ہلاکتیں ہیں۔ نئے متاثرین کی تعداد میں بھی کمی آئی ہے۔

22 ہزار 888 افراد صحتیابی کے بعد گھروں کو چلے گئے۔ نیشنل ہیلتھ کمیشن کے مطابق چین میں 2 ہزار 744 افراد کرونا سے ہلاک ہو چکے ہیں۔چین میں 78 ہزار 500 افراد کرونا کا شکار ہوئے ۔ صوبہ ہبئی میں لاک ڈاؤن ہے تاہم باقی شہروں میں زندگی معمول کی جانب لوٹ رہی ہے۔ کرونا وائرس پھیلنے کے خدشے کے باعث سعودی عرب نے عمرہ اور مسجد نبوی کی زیارت کے لیے آنے والوں کے لیے داخلہ عارضی طور پر بند کر دیا ہے۔

وائرس پھیلنے کے خدشات کے حامل ممالک کے شہریوں کے سیاحتی ویزا پر بھی پابندی لگا دی گئی ہے۔ ایران میں بھی کرونا کے خدشے کی وجہ سے مشہد اور قم شہر جانے پر پابندی عائد کی گئی ہے۔ جنوبی کوریا میں کرونا سے تیرہ افراد ہلاک ہو چکے ہیں۔اٹلی میں کرونا سے 12 افراد ہلاک ہوئے جبکہ 400 نئے کیس سامنے آئے ہیں۔ دنیا بھرکے چالیس ممالک میں 88 ہزار افراد کرونا کا شکار ہو چکے ہیں۔