کرونا کا خطرہ ،چمن میں پاک افغان سرحد ایک ہفتے کیلئے بند

مسافروں کی آمد و رفت، نیٹو سپلائی اور افغان ٹرانزٹ سمیت تجارتی سرگرمیاں معطل

پیر 2 مارچ 2020 22:11

چمن(اُردو پوائنٹ اخبارتازہ ترین - آن لائن۔ 02 مارچ2020ء) بلوچستان کے علاقے چمن میں پاک افغان سرحد کو کورونا وائرس پھیلنے کے خطرے کے باعث ایک ہفتے کے لیے بند کردیا گیا۔پاک افغان بارڈر بند کرنے کے باعث نیٹو سپلائی اور افغان ٹرانزٹ سمیت تمام نقل و حمل اور تجارتی سرگرمیاں معطل ہوگئی ہیں۔

(جاری ہے)

وفاقی تحقیقاتی ادارے (ایف آئی ای) کے مطابق وفاقی وزارت داخلہ نے کورونا وائرس کے ممکنہ پھیلاؤ کے خدشے کے پیش نظر چمن بارڈر بند کرنے کا فیصلہ کیا ہے۔

کورونا وائرس کے باعث پاک ایران سرحد بھی تفتان کے مقام پر 9روز سے بند ہے۔ ایران سے واپس آنے والے پاکستانی زائرین کو پاکستان ہاؤس میں قرنطینہ میں منتقل کردیا گیا ہے۔ ڈی سی چاغی کے مطابق تمام زائرین کی اسکریننگ مکمل کرلی گئی ہے اور کسی میں بھی کورونا وائرس کی علامات نہیں پائی گئی۔واضح رہے کہ پاکستان میں کورونا وائرس کے 4 کیسز سامنے آچکے ہیں۔