امریکا میں کرونا سے متاثرہ علاقوں میں طبی ایمرجنسی نافذ

واشنگٹن(اُردو پوائنٹ اخبارتازہ ترین - این این آئی۔ 23 مارچ2020ء) امریکی صدر ڈونلڈ ٹرمپ نے پیرسے کرونا وائرس سے متاثرہ ریاستوں میں طبی ایمرجنسی کے نفاذ کا اعلان کرتے ہوئے کہاہے کہ ہم کرونا وائرس کے خلاف حالت جنگ میں ہیں۔ ہمیں حٴْب الوطنی کا مظاہرہ کرنا ہے۔ امریکی ٹی وی کے مطابق انہوں نے کرونا سے متاثرہ علاقوں اور ریاستوں میں ہنگامی طبی اسٹیشن قائم کرنے کی ہدایت کی۔

ٹرمپ نے کرونا کی پیش رفت کے بارے میں تازہ ترین معلومات کے حصول کے لیے کراسز سیل قائم کرنا کا فیصلہ کیا ہے۔وائٹ ہائوس میں ایک پریس کانفرنس سے خطاب میں انہوں نے کہا کہ پوشیدہ دشمن کرونا کا مقابلہ کرنے کے لیے حکام کی ہدایات کا احترام کریں۔ٹرمپ نے مزید کہا کہ کرونا پر فتح کے بعد معیشت ایک بار پھر کھڑی ہوگی۔

(جاری ہے)

کرونا پوری امریکی قوم اور پوری دنیا کے لیے دشمن ہے۔

اسی سیاق میں ٹرمپ نے بتایا کہ انہوں نے ایران اور شمالی کوریا سے کہا تھا کہ ان کا ملک کرونا کا مقابلہ کرنے میں ان کی مدد کرنے کے لیے تیار ہے۔ انہوں نے چینی صدر سے کرونا کے بارے میں بات کی ہے۔ ان کا کہنا تھا کہ ہم چین سے ناراض ہیں۔ چین نے کرونا کے پھیلائو کو روکنے کیلیے بروقت اقدامات نہیں کیے۔انہوں نے کرونا سے متاثرہ ریاستوں میں 24 گھنٹوں کے اندر اندر تمام طبی سہولیات کی فراہمی کے احکامات صادر کیے۔ اس موقعے پر امریکی نائب صدر مائیک پنس نے کہا کہ اب تک امریکا میں کرونا کے شبے میں دو لاکھ 54 ہزار افراد کا چیک اپ کیا گیا ہے۔