یونہی بے سبب نہ پھرا کرو،کوئی شام گھر پر بھی ملا کرو، نعمان اعجازکا عوام کو پیغام

ہفتہ 28 مارچ 2020 21:23

لاہور (اُردو پوائنٹ اخبارتازہ ترین - آن لائن۔ 28 مارچ2020ء) اداکار نعمان اعجاز نے کورونا وائرس کی وبا سے بچنے کے بجائے گھروں سے بلا ضرورت باہر گھومنے والوں کو شاعرانہ انداز میں جواب دیا ہے۔

(جاری ہے)

اداکار نعمان اعجاز نے انسٹام گرام پر ایک ویڈیو شیئر کی جس میں انہوں نے کورونا وائرس سے بچائو کے پیش نظر حکومت کی جانب سے گھروں پر رہنے کی ہدایت پر عمل نہ کرنے والوں کو اپنی شاعری میں مخاطب کرتے ہوئے کہا کہ’’یوں ہی بے سبب نہ پھرا کرو، کوئی شام گھر پر بھی رہا کرو،وہ غزل کی سچی کتاب ہے اسے چپکے چپکے پڑھا کرو،کوئی ہاتھ بھی نہ ملائے گا جب گلے ملو گے تپاک سے،یہ نئے مزاج کا شہر ہے ، ذرا فاصلے سے ملا کرو‘‘۔

نعمان اعجاز نے برہمی کا اظہار کرتے ہوئے کہا کہ موجودہ صورتحال کو مد نظر رکھتے ہوئے اگرآج ہم اپنا دماغ استعمال کرتے ہوئے یہ سمجھتے کہ موقع کی نزاکت کیا ہے تو آج سڑکوں پر ہماری پولیس اور فوج کھڑی نہ ہوتی، لیکن افسوس کی بات ہے کہ فوج اور پولیس کے موجود ہونے کے باوجود بھی ہم سمجھنے کی کوشش نہیں کر رہے۔