ترکی سے پی آئی اے کی پرواز194 مسافروں لےکر پاکستان پہنچ گئی

نیو اسلام آباد ایئرپورٹ پر تمام مسافروں کی اسکریننگ کرلی گئی، مسافروں کو6 گھنٹے کیلئے قرنطینہ میں رکھا جائےگا

ثنااللہ ناگرہ جمعہ 3 اپریل 2020 22:30

اسلام آباد (اردوپوائنٹ اخبارتازہ ترین۔ 03 اپریل 2020ء) ترکی سے پی آئی اے کی پرواز194 مسافروں لے کر پاکستان پہنچ گئی، نیو اسلام آباد ایئرپورٹ پر تمام مسافروں کی اسکریننگ کرلی گئی، مسافروں کو6 گھنٹے کیلئے قرنطینہ میں رکھا جائےگا۔

(جاری ہے)

میڈیا رپورٹس کے مطابق ترکی سے قومی ایئر لائن کی پرواز پی کے782 نیواسلام آباد ایئرپورٹ پہنچ گئی ہے۔ ترکی سے مجموعی طور پر194مسافروں کولایا گیا ہے۔

نیو اسلام آباد ایئرپورٹ پر تمام مسافروں کی اسکریننگ کرلی گئی ہے۔ بتایا گیا ہے کہ تمام مسافروں کو6 گھنٹے کے لیے قرنطینہ میں رکھا جائےگا۔ ترجمان پی آئی اے کا کہنا ہے کہ مسافروں کے لیے اسلام آباد کے2 ہوٹلوں میں قرنطینہ بنائے گئے ہیں۔

دوبارہ چیک اپ کے بعد مسافروں کوگھر جانے کی اجازت دی جاسکےگی۔

دوسری جانب ملک میں کورونا وائرس سے مزید دو افراد جاں بحق ہوگئے جس کے بعد ہلاکتوں کی تعداد 37 تک جاپہنچی ہے ، مزید کیسز سامنے آنے کے بعد متاثرہ مریضوں کی مجموعی تعداد 2458 ہوگئی ہے۔

صوبہ سندھ کی وزیر صحت ڈاکٹر عذرا پیچوہو نے تصدیق کرتے ہوئے بتایا کہ کراچی میں مزید 2 افراد مہلک وائرس کا شکار بن گئے ہیں۔انہوںنے بتایاکہ جاں بحق مریضوں کی عمریں 80 اور 60 سال تھیں جن کے یکم اپریل کو کورونا وائرس کے ٹیسٹ بھی مثبت آئے تھے، دونوں افراد میں وائرس مقامی سطح پر منتقل ہوا۔وزیر صحت کے مطابق صوبے میں اب تک مہلک وائرس کے باعث انتقال کرنے والوں کی تعداد 13 ہوگئی ہے۔

سندھ میں مزید 2 ہلاکتوں کے بعد ملک بھرمیں جاں بحق افراد کی تعداد 37 تک جاپہنچی ہے۔ کورونا وائرس سے اب تک سندھ میں 13، پنجاب میں 11، خیبرپختونخوا 9، گلگت بلتستان 3 اور بلوچستان میں ایک ہلاکت ہوئی ہے۔ملک میں جمعہ کو اب تک 59 کیسز رپورٹ ہوچکے ہیں جن میں سے سندھ میں 42، پنجاب8، اسلام آباد 6 اور گلگت بلتستان میں 3 کیسز رپورٹ ہوئے ہیں۔سندھ کے محکمہ صحت کی سمری کے مطابق صوبے میں اب تک 42 نئے کیسز رپورٹ ہوئے ہیں جس کے بعد صوبے میں کیسز کی مجموعی تعداد 783 ہوگئی ہے۔

اسلام آباد میں کورونا وائرس کے مزید 6 کیسز سامنے آئے ہیں جو سرکاری پورٹل پر رپورٹ کیے گئے۔پورٹل کے مطابق وفاقی دارالحکومت میں کیسز کی مجموعی تعداد 68 ہوگئی ہے۔ گلگت بلتستان میں کورونا وائرس کے مزید 3 کیسز سامنے آئے جو سرکاری پورٹل پر رپورٹ ہوئے ہیں جس کے مطابق علاقے میں کیسز کی مجموعی تعداد 190 ہوگئی ہے۔گلگت بلتستان کی حکومت کی جانب سے ان کیسز کی فی الحال تصدیق نہیں کی گئی البتہ محکمہ اطلاعات کی جانب سے کورونا سے 8 افراد کے شفایاب ہونے کی اطلاع دی گئی ہے۔

پنجاب میں کورونا وائرس کے مزید 8 کیسز رپورٹ ہوئے ہیں جس کے بعد صوبے میں مجموعی کیسز کی تعداد 928 ہوگئی جس کی تصدیق صوبائی ڈیزاسٹر مینجمنٹ اتھارٹی (پی ڈی ایم ای) کی جانب سے کی گئی ہے۔پی ڈی ایم اے کے مطابق ڈی جی خان میں 213 زائرین اور ملتان میں 91 زائرین کورونا وائرس میں مبتلا ہیں۔اس کے علاوہ گوجرانوالہ 14، وہاڑی 8، ڈی جی خان 5، جہلم 28، سرگودھا 10، حافظ آباد 5، لاہور 204، راولپنڈ 53، اٹک 1، قصور 1، رائیونڈ قرنطینہ 142، ملتان 2، میانوالی 3، بہاولنگر 3، فیصل آباد قرنطینہ 5، منڈی بہاؤالدین 14، ننکانہ صاحب 13، لودھراں 2، فیصل آباد 9، نارووال 2، خوشاب 1، لیہ 1، گجرات 91، رحیم یار خان 3 ، بہاول پور اور سیالکوٹ میں ایک ایک مریض ہے۔

پی ڈی ایم اے کے مطابق صوبے بھر میں اب تک کورونا کے 6 مریض صحت یاب ہوچکے ہیں۔پنجاب میں اب تک کورونا وائرس سے ہونے والی 11 ہلاکتوں میں سے لاہور میں 5، راولپنڈی میں 4 اور رحیم یار خان، فیصل آباد میں ایک ایک ہلاکت ہوئی ہے۔