کینیڈا سے وطن پہنچنے والے پی آئی اے کے پائلٹس میں کورونا کی تصدیق

پیر 6 اپریل 2020 21:27

لاہور(اُردو پوائنٹ اخبارتازہ ترین - آن لائن۔ 06 اپریل2020ء) کینیڈا سے وطن واپس آنے والی قومی ائیر لائن (پی آئی ای) کے دو پائلٹس میں کورونا وائرس کی تصدیق ہونے کے بعد دونوں کپتانوں کو اسپتال منتقل کر دیا گیا ہے۔وزیر صحت پنجاب ڈاکٹر یاسمین راشد کے مطابق پی آئی اے کے دو پائلٹس اور عملے کے دیگر تین ارکان کا کورونا ٹیسٹ کیا گیا جن میں سے دونوں پائلٹس کا ٹیسٹ مثبت آیا ہے۔

(جاری ہے)

صوبائی وزیر صحت کے مطابق پائلٹس کا کورونا ٹیسٹ پازیٹو آنے کے بعد انھیں لاہور کے نجی اسپتال میں منتقل کر دیا گیا ہے جہاں ان کی حالت بہتر ہے جب کہ منفی ٹیسٹ کے حامل عملے کے ,دیگر تین ارکان کو 15 دن الگ رہنے کی ہدایت کی گئی ہے۔خیال رہے کہ گزشتہ روز پاکستان ایسوسی ایشن آف پائلٹس (پالپا) نے بھی قومی ائیر لائن کے کپتانوں کو جہاز اڑانے سے منع کر دیا تھا جب کہ سی ای او پی آئی اے ائیر مارشل ارشد ملک نے کراچی ائیرپورٹ پر قومی ائیر لائن کے جہاز کے عملے کو زبردستی قرنطینہ میں رکھنے کے اصرار پر کراچی سے بین الاقوامی فضائی آپریشن بند کرنے کا اعلان کر دیا تھا ۔